Ստիպել են ուտել հող, կղանք. Ոստիկանությունում նյութեր են նախապատրաստվում երևանյան մանկապարտեզում պակիստանցու երեխային բռնության ենթարկելու հաղորդման կապակցությամբ

ԵՐԵՎԱՆ, 3 փետրվարի./Նովոստի-Արմենիա/. Ոստիկանության Կենտրոնի բաժնում նյութեր նախապատրաստվում Երևանի մանկապարտեզներից մեկում պակիստանցու երեխայի նկատմամբ բռնություն գործադրելու հաղորդման կապակցությամբ:

Այս մասին «Նովոստի-Արմենիա» գործակալությանն ասաց ՀՀ ոստիկանության տեղեկատվության և հասարակայնության հետ կապերի վարչության պետի տեղակալ Էդգար Ջանոյանը:

«Ոստիկանությունում նման բովանդակությամբ հաղորդում ստացվել է, հանգամանքները պարզվում են: Ոստիկանության Կենտրոնի բաժնում նյութեր են նախապատրաստվում», - ասաց Ջանոյանը գործակալության թղթակցին:

Ավելի վաղ հայտնել էինք, որ հունվարի 31-ին Ա. Հ.-ն հաղորդում է տվել այն մասին, որ 2019թ մարտից մինչև 2021թ հոկտեմբերի 14-ը դուստրը՝ Է. Ու-ն հաճախել է Երևան քաղաքի մանկապարտեզներից մեկը, որտեղ դայակներ Ռ. Ղ.-ն, Ս. Կ.ն և դաստիարակներ Ի. Ա-ն եւ Ա. Կ.-ն հաշվի առնելով երեխայի հոր պակիստանցի լինելու հանգամանքը՝ պարբերաբար խմբի երեխաների միջոցով խոշտանգումների են ենթարկել վերջինիս:

Ըստ նույն աղբյուրի, երեխայի նկատմամբ կատարել են բռնի սեռական գործողություններ, պարանով ձեռքերը և պարանոցը կապելու եղանակով երկաթյա տաք խաղալիքով այրել նրա կրծքավանդակը, երեխային հարկադրել են ուտել հող, խոտ, կղանք, ինչի արդյունքում երեխային պատճառվել է ֆիզիկական ցավ և հոգեկան տառապանք:-0-