ԵՐԵՎԱՆ, 24 մայիսի./Նովոստի–Արմենիա/. Այսօր՝ մայիսի 24-ին, դետեկտիվ ժանրի դեպք է տեղի ունեցել Երևանում։
Shamshyan.com–ի հաղորդմամբ, ոստիկանության Նոր Նորքի բաժնի ծառայողներն օպերատիվ տեղեկություններ են ունեցել, որ Ջրվեժ թաղամասում գտնվող «Արմենթել» ընկերությանը պատկանող տարածքից գողություն է կատարվելու։
Ոստիկանները հասել են այն պահին, երբ Ford մակնիշի ավտոմեքենան, բարձված գողոնով, նշված տարածքից դուրս էր գալիս։
Ոստիկանները հրահանգել են, որպեսզի այդ, ինչպես նաև մեկ այլ Ford Transit մակնիշի ավտոմեքենաները կանգնեն, սակայն վարորդները, չենթարկվելով ոստիկանների օրինական պահանջին, դիմել են փախուստի։ Սկսվել է հետապնդում, և Նոր Նորքի ոստիկաններին օգնության են հասել ՀՀ ոստիկանության պարեկաիյն ծառայության Երևանի գնդի 3-րդ գումարտակի 3-րդ վաշտի պարեկները։
Հետապնդումը շարունակվել է մինչև Դավիթ Բեկի փողոցը, մեկ այլ տեղից էլ փախուստի դիմածներին հետապնդել են են այլ պարեկներ։
Պարեկները մի քանի անգամ բարձրախոսով հրահանգել են, որպեսզի փախուստի դիմողները կանգնեն, սակայն նրանք, դարձյալ չենթարկվելով, շարունակել են դիմել փախուստի։ Ոստիկաններն ու պարեկները կասկածելի գողոնով բարձված Ford-ը հետապնդել են մոտ 4 կմ, ու պարեկներից մեկը, ով վարում էր ծառայողական ավտոմեքենան, նախազգուշական կրակոցներ է արձակել օդ, ապա տեսնելով, որ դա էլ չի զգաստացնում Ford-ի վարորդին, ընթացքում դիպուկ կրակոցներ է արձակել Ford-ի անվադողերի ուղղությամբ, որից հետո Ford-ի վարորդը կորցրել է ավտոմեքենայի կառավարումը և բախվել բազալտե եզրաքարերին, ապա ծառերին և մոտ 200 մետր կողաշրջված սահելով՝ հայտնվել ռեստորանային համալիրի դիմաց։
Կողաշրջվելուց հետո ավտոմեքենայի վարորդը, նրա կողքի ուղևորն ու հետևի հատվածում գտնվողները դիմել են փախուստի, սակայն ոստիկաններին ու պարեկներին հաջողվել է նրանցից մի քանիսին հետապնդել և վնասազերծել։ Նրանք բերման են ենթարկվել ոստիկանության Նոր Նորքի բաժին։
Կողաշրջված ավտոմեքենայում հայտնաբերվել են խոշոր չափի պղնձե մալուխներ։ Մյուս փախուստի դիմած ավտոմեքենան նույնպես հայտնաբերվել և տեղափոխվել է պահպանվող հատուկ տարածք։
Ավտոմեքենայում հայտնաբերվել է նաև մալուխներ կտրելու համար նախատեսված հատուկ մկրատ, որը, ըստ նախնական տեղեկությունների, հանցագործության գործիքներից է։
Կայքի տեղեկություններով, գողոնը կազմում է մոտ 4 մլն դրամ։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:–0–