Մեկ օրվա մեջ երրորդ երկրաշարժը. օջախը գրեթե նույնն է

ԵՐԵՎԱՆ, 25 հոկտեմբերի./Նովոստի–Արմենիա/. 24 ժամվա մեջ երրորդ երկրաշարժն է գրանցվել Հայաստան–Վրաստան սահմանային գոտում։

ՀՀ ԱԻՆ–ի հաղորդմամբ, հոկտեմբերի 25-ին, տեղական ժամանակով ժամը 21:00-ին (Գրինվիչի ժամանակով ժամը 17:00-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 41.12⁰ և արևելյան երկայնության 43.91⁰ աշխարհագրական կոորդինատներով՝  Հայաստան-Վրաստան սահմանային գոտի` Բավրա գյուղից 8 կմ արևելք, օջախի 10 կմ խորությամբ, 2.5 մագնիտուդով երկրաշարժ:

Էպիկենտրոնային գոտում ստորգետնյա ցնցման ուժգնությունը կազմել է 3 բալ:

Երկրաշարժը զգացվել է Շիրակի մարզի Բավրա գյուղում, Լոռու մարզի Տաշիր, Ալավերդի քաղաքներում և Մեծավան գյուղում 2-3 բալ ուժգնությամբ:

Ինչպես հաղորդել էինք ավելի վաղ, այսօր տեղական ժամանակով ժամը 16։57–ին երկրաշարժ է գրանցվել Շիրակի մարզի Բավրա գյուղից 10 կմ հյուսիս-արևելք։

Էպիկենտրոնային գոտում ստորգետնյա ցնցման ուժգնությունը կազմել է 3-4 բալ:

Երկրաշարժը զգացվել է Շիրակի մարզի Գյումրի, Լոռու մարզի Սպիտակ, Տաշիր, Ալավերդի քաղաքներում, ինչպես նաև Նորաշեն, Սարչապետ, Ձորամուտ գյուղերում՝ 2-3 բալ ուժգնությամբ:

ԱԻՆ–ի հաղորդմամբ, հոկտեմբերի 24-ին, տեղական ժամանակով ժամը 21։04-ին երկրաշարժ է գրանցվել  Հայաստան-Վրաստան սահմանային գոտի` Բավրա գյուղից 9 կմ արևելք:

Էպիկենտրոնային գոտում ստորգետնյա ցնցման ուժգնությունը կազմել է 5 բալ: