ԵՐԵՎԱՆ, 11 նոյեմբերի./Նովոստի–Արմենիա/. Այսօր՝ նոյեմբերի 11-ին, մարտաֆիլմ հիշեցնող կրակոցներ և սպանություններ է տեղի ունեցել Երևանում:
Shamshyan.com–ի հաղորդմամբ, ժամը 02:50-ի սահմաններում ՀՀ Ոստիկանության օպերատիվ կառավարման կենտրոն ահազանգ է ստացվել, որ Քանաքեռի սեփական տներից մեկում կրակոցներ են հնչել, կան տուժածներ:
Ոստիկաններն ու քննիչները Քանաքեռի 16 փողոցի սեփական տներից մեկի բակում հայտնաբերել են տղամարդու 2 դի: Պարզվել է նաև, որ նշված վայրից ևս 2 քաղաքացի տեղափոխվել է հիվանդանոց: Ըստ տեղեկութունների, նրանք ճանապարհին մահացել են:
Դեպքի վայրում հայտնաբերվել են մի քանի տեսակի զենքեր, կրակված պարկուճներ, գնդակներ, դանակ, արնանման հետքեր:
Կայքի տեղեկություններով, տան բակում հայտնաբերված սպանվածներից մեկը քրեական աշխարհում մեծ հեղինակություն ունեցող «Քանաքեռցի Տույն» էր, իսկ տունը, որտեղ տեղի է ունեցել դեպքը, ըստ դեպքի վայրում հավաքված քաղաքացիների, ովքեր հրաժարվեցին տեսախցիկի առաջ խոսել, պատկանում է նախկին պատգամավոր Արտուշին:
Քննչական կոմիտեի նախագահ Արգիշտի Քարամյանի որոշմամբ ստեղծվել է քննչական խումբ Երևան քաղաքի քննչական վարչության ծանր հանցագործությունների քննության վարչությունում։
Կայքի տեղեկություններով, ոստիկաններն ու քննիչները պարզել են, որ «աջ սրունքի դրսային մակերեսի հրազենային վնասվածք» ախտորոշմամբ թիվ 1 համալսարանական հիվանդանոց է ընդունվել Քանաքեռի բնակիչ, 19-ամյա Գ.Ջ–ն: Միքայելյան վիրաբուժության ինստիտուտ է տեղափոխվել Քանաքեռ բնակիչ, 61-ամյա Ա.Ս–ն՝ «հեմոռագիկ շոկ, հրազենային վնասվածք» ախտորոշմամբ: Նույն հիվանդոնոց է տեղափոխվել Քանաքեռ բնակիչ, 27-ամյա Հ.Ս.–ն՝ «աջ ոտնաթաթի հրազենային վնասվածք» ախտորոշմամբ: Նույն հիվանդանոց է տեղափոխվել Քանաքեռ բնակիչ, 37-ամյա Վ.Ս.–ն՝ «կրծքավանդակի որովայնի շրջանի հրազենային վնասվածք» ախտորոշմամբ:
«Հրազենային վնասվածք» ախտորոշմամբ նույն հիվանդանոց է տեղափոխվել Զ. Սարկավագի փողոցի բնակիչ, 38-ամյա Ա.Բ–ն: Նույն հիվանդանոց է տեղափոխվել «ձախ նախաբազկի միջանցիկ հրազենային վիրավորում վնասվածք» ախտրոոշմամբ Ա.Պ–ն: Պարզվել է,որ տեղում մահացել 43-ամյա Ա.Ղ–ն, ով քրեական աշխարհում մեծ հեղինակություն ունեցող «Քանաքեռցի Տույն» էր և Քանաքեռի բնակիչ, 37-այմա Ա.Խ–ն: Հիվանդանոցում Ա. Բորյանն ու Ա. Սիմոնյանը, գիտակցության չգալով, մահացել են:
Ինչպես հայտնում է Հայաստանի քննչական կոմիտեի մամուլի քարտուղար Վարդան Թադևոսյանը, փաստի առթիվ հարուցվել է քրեական գործ՝ ՀՀ քր օր-ի 104 հոդվածի 2-րդ մասի 1-ին (սպանություն) և 6-րդ կետերի և 235 հոդվածի 1-ին մասի հատկանիշներով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):
ՀՀ ոստիկանության հաղորդմամբ, դեպքի վայրի զննությամբ հայտնաբերվել են 45 պարկուճ և գնդակներ, 4 ատրճանակ, 2 ինքնաձիգ՝ փամփուշտներով։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:–0–
