ԵՐԵՎԱՆ, 12 սեպտեմբերի./Նովոստի–Արմենիա/. Սեպտեմբերի 10–ին Գյումրու Մուշ 2 թաղամասի 32 շենքի իր բնակարանում հայտնաբերվել է ՌԴ քաղաքացի, Գյումրիում տեղակայված ՌԴ 102–րդ ռազմաբազայի ռուս զինվորականի դին։
Ինչպես գրում է «Հայկական ժամանակ» օրաթերթը, մահացածը 23–ամյա Ալեքսանդր Բաբուշկինն է։ Մահվան պատճառ է նշված փայծախի վնասումը։
«Դեպքի պահին պայմանագրային զինծառայողը եղել է տանը` ծառայակցի հետ։ Վերջինս գնացել է խոհանոց թեյ պատրաստելու, այդ պահին ինչ–որ ձայն է լսել, եկել, տեսել է` ընկերն անգիտակից ընկած է հատակին։ Ծառայակիցը զանգել է շտապօգնություն» – գրում է թերթը։
Աղբյուրի հաղորդմամբ, ըստ ՇՄ դատախազ Կարեն Գաբրիելյանի, դեպքի վայր հասնելուն պես շտապօգնության աշխատակիցներն արձանագրել են ռուս զինվորականի մահը։
«Արդեն ձեռք են բերվել տվյալներ, համաձայն որոնց` Բաբուշկինը վնասվածքները ստացել է մահանալուց 3 օր առաջ` Գյումրիում մոտոցիկլով ինքնավթարի ենթարկվելու պատճառով», – նշվում է հոդվածում։
Ըստ դատախազի, մոտոցիկլի զննությամբ հայտնաբերվել են վնասվածքներ։
«Տվյալներ կային, որ այդ դեպքի ականատես անձինք կան, արդեն պարզ են նրանց ինքնությունը, միջոցառումներ են ձեռնարկվում նրանց քննչական բաժին հրավիրելու և բացատրություն վերցնելու համար», – ասել է դատախազը։
Օրաթերթի հաղորդմամբ, մահացած 23–ամյա Ալեքսանդր Բաբուշկինի մարմնի վրա վնասվածքներ են հայտնաբերվել նաև քթի, ձեռքերի շրջանում։ Առկա է դատաբժշկական փորձաքննության նախնական տվյալները` փայծախի վնասում, որը նախնական տվյալներով բնորոշ է վթարի ենթարկվելուն։–0–