Հարյուրավոր զոհեր և վիրավորներ. Թուրքիայում և Սիրիայում հզոր երկրաշարժեր են գրանցվել (ՖՈՏՈ, ՎԻԴԵՈ)

ԵՐԵՎԱՆ, 6 փետրվարի./Նովոստի–Արմենիա/. Փետրվարի 6-ին Թուրքիայի հարավ-արևելքում գտնվող Քահրամանմարաշ նահանգում 7,4 մագնիտուդ ուժգնությամբ երկրաշարժ է տեղի ունեցել։ Թուրք սեյսմոլոգների կարծիքով՝ այն կարող է դառնալ Թուրքիայի վերջին ժամանակների ամենաավերիչ երկրաշարժերից մեկը։

Արտակարգ իրավիճակների պետական գործակալությունը հայտնել է, որ երկրաշարժը գրանցվել է Քահրամանմարաշ գավառի Պազարջիկ շրջանում՝ 7 կմ խորության վրա, տեղական ժամանակով 04:17-ին:

Ավելի ուշ 6,4-ից 6,6 մագնիտուդ ուժգնությամբ ևս երեք երկրաշարժ է տեղի ունեցել Գազիանթեփ նահանգում։ Գրանցվել է 22 հետցնցում։



Երկրաշարժը զգացվել է 10 նահանգներում։ Շանլըուրֆա նահանգում առնվազն 16 տուն է փլուզվել։ Ադանայում երեք բարձրահարկ բնակելի շենքեր ամբողջությամբ ավերվել են։

Թուրքիայում հայտարարվել է տագնապի ամենաբարձր մակարդակ։ Այն նախատեսում է միջազգային օգնություն։ Ավելի ուշ Միջերկրական ծովում 4,8 մագնիտուդ ուժգնությամբ երկրաշարժ է գրանցվել, որն ազդել է Սիրիայի վրա։



Սիրիայում հետցնցումների հետևանքով Համա նահանգում ավերվել են մի քանի շենքեր։

Բհաննեսի Երկրաֆիզիկական հետազոտությունների ազգային կենտրոնի սեյսմոլոգները հայտնել են, որ երկրի մակերևույթի ուժեղ տատանումներ զգացվել են Լիբանանի շատ շրջաններում, այդ թվում՝ մայրաքաղաք Բեյրութում և Բեկաա հովտում:
Թուրքիայում տեղի ունեցած երկրաշարժի ցնցումները զգացվել են նաև Բաղդադում։

Վերջին տվյալներով, Սիրիայում երկրաշարժի զոհերի թիվը հասել է 237–ի, կա 639 տուժած։–0–