Գավառում հայտնաբերվել է կորած տղամարդու դին

ԵՐԵՎԱՆ, 26 փետրվարի./Նովոստի–Արմենիա/. Գավառում այսօր հայտնաբերվել է նախօրեին կորած տղամարդու դին, հաղորդում է ՀՀ ԱԻՆ Փրկարար ծառայությունը։

Այսօր Ժամը 15:10-ին փրկարարները Գավառի «Բզոյի գյոլ» կոչվող տարածքի մոտակայքում հայտնաբերել են Բագրատ Մ.-ի (ծնված 1983 թ.) դին:

Հիշեցնենք, որ փետրվարի 26-ին, ժամը 00:59-ին Ճգնաժամային կառավարման ազգային կենտրոն տեղեկություն էր հաղորդվել, որ Գեղարքունիքի մարզի Գավառ քաղաքի Հացառատ թաղամասի բնակիչ Բագրատ Մ.-ն (մոտ 32 տարեկան) փետրվարի 25-ի ժամը 21:00-ի սահմաններում տանից դուրս է եկել և չի վերադարձել։

Քաղաքացին վերջին անգամ հեռախոսով խոսել էր ժամը 21:30-ին և տեղեկացրել, որ գտնվում է Ծաղկաշեն համայնքին հարակից «Սպիտակ Քար» կոչվող հանդամասում:

ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ մեկնել էր վերոնշյալ տարածք որոնողական աշխատանքների:

Ժամը 01:36-ից փրկարարներն ոստիկանության աշխատակիցների և քաղաքացու հարազատների հետ համատեղ իրականացրել էին որոնողական աշխատանքներ, սակայն ժամը 02:17-ին տեղանքի բարդ ռելիեֆի և մթության պատճառով աշխատանքները ժամանակավորապես դադարեցվել էին։ Փետրվարի 26-ին, ժամը 11:26-ին փրկարար ծառայողների և ոստիկանության աշխատակիցների կողմից որոնողական աշխատանքները վերսկսվել էին: Աշխատանքներին աջակցում էին կորած քաղաքացու հարազատները:–0–