ԵՐԵՎԱՆ, 13 փետրվարի./Նովոստի–Արմենիա/. Երկրաշարժի հետևանքով, նախնական տվյալներով, ավերածություններ չկան, հայտնում է ՀՀ վարչապետ Նիկոլ Փաշինյանը Facebook-յան էջում:
«Երևանի Էրեբունի համայնքում մեկ ինքնաշեն տնակ է վնասվել, մեկ քաղաքացի թեթև վնասվածք է ստացել: Մի քանի տեղերում երեսպատման սալիկներ են ընկել: Նախնական տվյալներով տուժածներ չկան։ Երկրաշարժի էպիկենտրոնը նախնական տվյալներով Արմավիրի մարզի Փարաքար գյուղի մոտակայքում է եղել», – նշել է վարչապետը:
ՀՀ ԱԻՆ–ի հաղորդմամբ, ստացվել են ահազանգեր Այվազովսկու և Սմբատ Զորավարի փողոցներում՝ տեղի ունեցած երկրաշարժի հետևանքով ավերածությունների վերաբերյալ։
Նշենք, որ այսօր տեղական ժամանակով ժամը 15։29–ին երկրաշարժ է
գրանցվել Երևան քաղաքից 8 կմ հարավ-արևելք, օջախի 10 կմ խորությամբ, 4.7 մագնիտուդով: Էպիկենտրոնային գոտում ստորգետնյա ցնցման ուժգնությունը կազմել է 6-7 բալ։
Երկրաշարժը զգացվել է Երևան քաղաքում` 5-6 բալ ուժգնությամբ, Արագածոտնի, Արարատի, Շիրակի, Արմավիրի, Վայոց Ձորի մարզերում` 3-4 բալ ուժգնությամբ:–0–