Դետեկտիվ ժանրի վնասազերծում Գեղարքունիքում. տղամարդը նռնակներով սպառնացել է պայթեցնել ընտանիքի անդամներին

ԵՐԵՎԱՆ, 9 հունիսի./Նովոստի–Արմենիա/. Երեկ՝ հունիսի 8-ին, դետեկտիվ ժանրի վնասազերծման դեպք է տեղի ունեցել Գեղարքունիքի մարզում։

Shamshyan.com–ի հաղորդմամբ, ժամը 21։20-ի սահմաններում ՀՀ Ներքին գործերի նախարարության Ոստիկանության օպերատիվ կառավարման կենտրոն ահազանգ է ստացվել, և ահազանգողն առանց հստակ ինչ-որ բան ասելու, շնչակտուր, անհասկանալի արտահայտություններ է արել։

Օպերատիվ կառավարման կենտրոնի ծառայողը հեռախոսի մյուս կողմում լսել է կնոջ և երկու տղամարդու վիճաբանության, բղավոցի ձայներ։ Եվ այդ խոսակցության ժամանակ լսվել է, որ տղամարդկանցից մեկն ասել է, որ մյուսի մոտ նռնակ կա, ապա հեռախոսազանգն ընդհատվել է։ Զանգահարողը չի հայտնել նաև, թե որտեղից է ահազանգել։

Օպերատիվ կառավարման կենտրոնից հետադարձ զանգին բղավոցով պատասխանել մի կին և հայտնել, որ թյուրիմացություն է, երեխան պատահաբար է զանգահարել, դա չի համապատասխանում իրականությանը։

Ոստիկանները, սակայն, այդ կնոջ խոսքերին չեն հավատացել։

Կարճ ժամանակում պարզվել է, որ ահազանգը հնչել է Գեղարքունիքի մարզից։

Արդեն տեղում մարզի ոստիկանները ճշտել են ահազանգող բնակչի բնակության վայրը և մեկնել այնտեղ։

Ահազանգը հնչել է Լեռնակերտ գյուղի բնակչի բնակարանից։

Արդեն տեղում իրավապահները պարզել են, որ 40-ամյա Կ. Մ․-ն և 45-ամյա Ա. Մ․-ն հաճախակի վիճաբանություն են ունեցել ընտանիքում, ծեծել, բռնություն կիրառել, երբեմն էլ սպառնացել են, որ նռնակով կպայթեցնեն։ Եվ երեկ, ժամը 20։00-ի սահմաններում Ա. Մ․-ն 2 նռնակը ձեռքին, գինովցած վիճակում մտել է տուն, ծեծի ենթարկել ընտանիքի անդամներին և սպառնացել, որ նռնակներով կպայթեցնի ու կսպանի նրանց։ Ապա իր հոր և եղբոր դիմադրությանը հանդիպելով` դուրս է եկել տանից։

Ոստիկանները տան այգում, խոտերի մեջ, հայտնաբերել են կասկածելի պոլիէթիլենային տոպրակ։ Զննությամբ տոպրակում հայտնաբերվել են 2 հատ «Ֆ-1» նռնակներ` իրենց պայթուցիչներով։

Կ. Մ․-ն առանձնատնից քիչ հեռավորության վրա գտնվող կիսաքանդ շինությունում առկա մեղվափեթակի արկղի միջից ոստիկաներին և քննիչներին է ներկայացրել է 1 հատ 4 լիտր տարա, որի մեջ եղել է181 գրամ մաքուր քաշով դեղնականաչավուն, կանեփանման, մանրացված զանգված և 1 հատ 3 լիտրանոց տարա, որի մեջ եղել է դեղնականաչավուն հեղուկ։ Հայտնաբերվել են նաև կանեփի զանգված ծխելու համար, տարբեր չափերի պլաստմասե շշեր և 1 հատ ներարկիչ։

Արդեն փաստերի ճնշման տակ Կ. Մ․-ն հայտնել է, որ հայտնաբերված կանեփաման զանգվածը պատկանում է իր որդի Ա. Մ․-ին։

Դեպքի փաստով՝ Մարտունու քննչական բաժնում նախաձեռնվել է վարույթ։

Ա.Մ․-ն հայտնաբերվել և ձերբակալվել, ապա տեղափոխվել է Ոստիկանության Մարտունու բաժին, որտեղից էլ նրան ներկայացրել են Մարտունու քննչական բաժին։

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով։–0–