ԵՐԵՎԱՆ, 21 ապրիլի./Նովոստի–Արմենիա/. Այսօր՝ ապրիլի 21-ին, դաժան սպանություն է տեղի ունեցել Գեղարքունիքի մարզում:
Shamshyan.com–ի հաղորդմամբ, ժամը 13:50-ի սահմաններում ոստիկանության Ճամբարակի բաժին ահազանգ է ստացվել, որ Ճամբարակ խոշորացված համայնքի Վահան գյուղի տներից մեկում տղամարդու դի կա:
Ոստիկաններն ու քննիչները Վահան գյուղի սեփական տան մեջ հայտնաբերել են տանտիրոջ՝ 66-ամյա Լյովիկ Բարսեղյանի դին:
Загружается новость ... "Лево"
Կայքի տեղեկություններով՝ ժամանած դատաբժիշկը ոստիկաններին և քննիչներին հայտնել է, որ մահացածի գլխին կան կացնի մի քանի հարվածի հետքեր:
Մինչ դատաբժիշկը զննում էր դին, Գեղարքունիքի մարզի ոստիկաններն ու քննիչները, կատարելով ճիշտ օպերատիվ-հետախուզական և քննչական համատեղ միջոցառումներ, պարզել են կասկածյալի ինքնությունը:
Մարզի ոստիկանները կարճ ժամանակում օպերատիվ տեղեկություններ են ստացել, որ կասկածյալն ուղևորվում է դեպի Սևան։ Նրանք Լճաշեն գյուղի վարչական տարածքում դարանակալել են ու Սևանի ոստիկանների ու քննիչների հետ կարողացել պրոֆեսիոնալ կերպով վնասազերծել Վահան գյուղի բնակիչ, 62-ամյա Պետիկ Դեմիրճյանին, ում մոտ եղել է 2 մարտական նռնակ՝ իր պայթուցիչներով:
Փաստի առթիվ հարուցվել է քրեական գործ ՀՀ ՔՕ 104 հոդվածի 1-ին մասի (սպանություն) և 235 հոդվածի 1-ին մասի (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) հատկանիշներով:
Քննիչի որոշմամբ կասկածյալ Պ. Դեմիրճյանը ձերբակալվել է:
Կայքի տեղեկություններով՝ հայտնաբերվել է նաև հանցագործության գործիք կացինը:–0–
