Ծեծել են ու դանակահարել. Գյումրու կենտրոնում սպանություն է տեղի ունեցել

ԵՐԵՎԱՆ, 28 փետրվարի./Նովոստի–Արմենիա/. Նախօրեին` փետրվարի 27-ին, սպանություն է տեղի ունեցել Շիրակի մարզում:

Shamshyan.com–ի հաղորդմամբ, ժամը 01:05-ի սահմաններում Գյումրի քաղաքի շտապօգնության կայանից ոստիկանության Գյումրու Կումայրիի բաժին ահազանգ է ստացվել, որ բժիշկների հերթապահ խումբը Աթարբեկյան փողոցի «Անդրանիկի» արձանի դիմացից Գյումրու բժշկական կենտրոն է տեղափոխել դանակահարված մի քաղաքացու:

Հիվանդանոցում բժիշկները ոստիկաններին և քննիչներին հայտնել են, որ վիրավորն իրենց մոտ է տեղափոխվել «աջ ազդրի վերին երրորդի կտրած-ծակած վերք, կենսաբանական մահ» ախտորոշմամբ:

Շիրակի մարզի ոստիկաններն ու քննիչները պարզել են, որ մահացածը Գյումրի քաղաքի բնակիչ, 35-ամյա Վ. Հարությունյանն է: Ոստիկանները Տիգրանյան փողոցի թիվ 100 հասցեի դիմաց հայտնաբերել են արնանման հետքեր: Փաստի առթիվ հարուցվել է քրեական գործ:

Կայքի հաղորդմամբ, ոստիկանները պարզել են Վ. Հարությունյանի սպանության որոշ մանրամասներ։

Օպերատիվ-հետախուզական միջոցառումների և քննչական գործողությունների արդյունքում պարզվել է, որ նույն օրը, ժամը 01։00-ի սահմաններում Գյումրի քաղաքի Տիգրանյան փողոցի 100 հասցեի դիմաց Գյումրու բնակիչներ՝ 28-ամյա Ա. Տրդատյանը, 25-ամյա Կ. Տրդատյանը և 30-ամյա Հ. Մալխասյանը վիճաբանության ընթացքում ծեծի են ենթարկել Վ, Հարությունյանին, որի ընթացքում Հ. Մալխասյանը դանակով հարվածել է Վ Հարությունյանին, ինչի հետևանքով վերջինս մահացել է։

Շիրակի մարզի ոստիկաններն ու քննիչները ձեռնարկում են անհրաժեշտ օպերատիվ հետախուզական և քննչական համատեղ գործողություններ՝ կասկածյալներ Ա., Կ. Տրդատյաններին և Հ. Մալխասյանին և հանցագործության գործիք հանդիսացող դանակը հայտնաբերելու ուղությամբ։

Կայքի տեղեկություններով՝ Ա. և Կ. Տրդատյանները հարազատ եղբայրներ են։–0–