ԵՐԵՎԱՆ, 22 օգոստոսի./Նովոստի-Արմենիա/. Ավտովթարի հետևանքով մահացել է ՀՀ-ում Արցախի Հանրապետության մշտական ներկայացուցչության աշխատակից Բելլա Դադամյանը:
Այս մասին հայտնել է Արցախի ԱԳ նախարար Դավիթ Բաբայանը:
«Մեծ ցավով տեղեկացա Հայաստանի Հանրապետությունում Արցախի Հանրապետության մշտական ներկայացուցչության աշխատակից Բելլա Դադամյանի ողբերգական մահվան մասին։ Մենք կորցրեցինք պարկեշտ, պատասխանատու և բանիմաց գործընկերոջ։ ԱԳՆ ողջ անձնակազմի և անձամբ իմ անունից խորին ցավակցություն և վշտակցություն եմ հայտնում Բելլա Դադամյանի ընտանիքին և հարազատներին։ Բարդ է բառերով նկարագրել և բնութագրել այս սարսափելի ողբերգությունը։ Այս դժվարին պահին ձեզ հետ կիսում ենք անդառնալի կորստյան վիշտը։ Մաղթում ոգու տոկունություն և համբերություն», - նշել է Բաբայանը:
Նախօրեին ՀՀ ԱԻՆ Փրկարար ծառայությունը հայտնել էր, որ ժամը 15:54-ի սահմաններում Երևան-Մեղրի ավտոճանապարհի 48-րդ կմ-ին, բախվել են «Ford Focus» (վարորդ՝ Բ․ Դ․, ծնված 1988թ.) և «Kia Rio» (վարորդ՝ Ա․ Դ․, ծնված 1982 թ.) մակնիշների ավտոմեքենաները։
Մինչ փրկարարների կանչի վայր հասնելը, «Ford Focus» մակնիշի ավտոմեքենայի ուղևորներ Վ․ Ա․-ն (ծնված 2010 թ․), Մ․ Ա․-ն (ծնված 2017 թ․), Դ․ Ա․-ն (ծնված 2016 թ․) և «Kia Rio» մակնիշի ավտոմեքենայի ուղևորներ Ա․ Վ․-ն (ծնված 1993 թ.) և Ջ․ Ք․-ն հոսպիտալացվել են Արարատ քաղաքի ԲԿ, այնուհետև «Ford Focus» մակնիշի ավտոմեքենայի ուղևորները տեղափոխվել են Երևան քաղաքի «Սուրբ Աստվածամայր» ԲԿ, «Kia Rio» մակնիշի ավտոմեքենայի ուղևոր Ա․ Վ․-ն Երևան քաղաքի «Էրեբունի» ԲԿ, իսկ Ջ․ Ք․-ն Երևան քաղաքի «Արմենիա» ՀԲԿ․ բժիշկները Վ․ Ա․-ի, Մ․ Ա․-ի, Դ․ Ա․-ի և Ջ․ Ք․-ի առողջական վիճակը գնահատել են միջին ծանրության, իսկ Ա․ Վ․-ի, Ա․Դ․-ի և Բ․Դ․-ի առողջական վիճակը՝ ծանր։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում