Արտասովոր գողություն Գեղարքունիքում.երիտասարդները տնից գողացել էին գրեթե ամբողջական մեքենա (ՎԻԴԵՈ)

ԵՐԵՎԱՆ, 7 հոկտեմբերի./Նովոստի–Արմենիա/. Ոստիկանության Վարդենիսի բաժնի քրեական հետախույզները օպերատիվ տեղեկությունն իրացրին Գեղարքունիքի մարզային վարչության գործընկերների հետ: Հոկտեմբերի 4-ին, գողություն կատարելու կասկածանքով, նրանք բաժին բերման ենթարկեցին Գեղամասար գյուղի բնակիչներ, 21 և 22 տարեկան երկու երիտասարդի, հաղորդում է ՀՀ ոստիկանությունը:

«Իրենց խոստովանությամբ երիտասարդները հաստատեցին տեղեկությունը. օգտվելով տանտերերի բացակայությունից՝ սեպտեմբերի 30-ի կեսգիշերին դռան կախովի կողպեքի օղը տեխնիկական միջոցով տեղահան են արել, մտել համագյուղացու տուն և խոհանոցից գողացել «ՎԱԶ-2106» մակնիշի ավտոմեքենայի շարժիչ, փոխանցման տուփ, չորս անիվ, մեկ հովացման սարք, մեկ բենզասղոց և դետալների սոսնձման մեկ սարք», – նշվում է գերատեսչության հաղորդագրության մեջ:

Տուժածին պատճառվել է մոտ 330 հազար դրամի վնաս: Գողոնը հայտնաբերվել է: Հանգամանքները պարզվում են:–0–