ԵՐԵՎԱՆ, 16 նոյեմբերի./Նովոստի–Արմենիա/. Խոսրովի արգելոցում անհայտ անձինք քանդել են V-XVII դարերի խաչքարերն ու փորել են գերեզմանոցները։
«Էկո-մեդիա» լրագրողական ցանցը տեսանյութ է հրապարակել ՝ հետևյալ գրառմամբ ՝ «Գանձագողերը ավերում են «Խոսրովի անտառ» պետարգելոցի Խաչաձորի տեղամասի «Մանկուք»–ի խաչքարերը»։ Տեսանյութում ակնհայտ երևում են ավերված խաչքարերը, փորված գերեզմանոցներն ու հանված ոսկորները։ Հայտնի չէ, թե ով է ուղարկել տեսանյութը, աղբյուրի համաձայն ՝ անհայտ էջից են ուղարկել։
Մանկուկ գետի հովտում է գտնվում «Մանկուք» հուշարձանախումբը (V-XVII դդ.): Մանկուկը որպես բնակավայր գոյություն է ունեցել մինչև 1950-ական թվականները:
Հայաստանի հանրային ռադիոյի հաղորդմամբ, արգելոցի տնօրինությունից ճշտել են, որ տեսանյութը համապատասխանում է իրականությանը, հետաքննություն է սկսվել։
«Խոսրովի անտառ» պետական արգելոցի տնօրեն Հրաչյա Հովակիմյանը կատարվածը վանդալիզմի է որակել։
«Ինձ համար շատ անհասկանալի բան է սա։ Յոթ տարվա մեջ առաջին դեպքն է։ Բարբարոսություն է, մարդու գերեզման են քանդում, ոսկորներ են հանում։ Սա վանդալիզմ է»,- ասել է Հրաչյա Հովակիմյանը։
Հովակիմյանի խոսքով, արգելոցի Խաչաձորի տեղամասը բավականին հեռու է և տեղանքի խորդուբորդ ու դժվար ճանապարհը թույլ չի տալիս հեշտությամբ այնտեղ հասնել։
«Մեքենայի մուտքը բացառված է, մնում է միայն ձիով այնտեղ հասնելու տարբերակը։ Դա նշանակում է, որ վանդալները տեղանքին լավ ծանոթ են», – նշել է Հովակիմյանը։–0–