220 դոլարի վնաս. երիտասարդները Վրաստանի Թելեթի գյուղից ավտոքարշակով Վանաձոր են տեղափոխել անսարք Opel–ն ու չեն վճարել գումարը

ԵՐԵՎԱՆ, 13 սեպտեմբերի./Նովոստի–Արմենիա/. Սեպտեմբերի 12-ին, ժամը 13.20-ին, ոստիկանության Տարոնի բաժնում մի տղամարդ հաղորդում է տվել, որ սեպտեմբերի 12-ին, ժամը 03.30-ի սահմաններում, Թբիլիսի քաղաքից 12 կմ հեռավորությամբ գտնվող Թելեթի գյուղի մոտակայքից իր ավտոքարշակով Վանաձոր է տեղափոխել անծանոթ երեք անձանց և նրանց անսարք «Օպել Աստրա» մակնիշի ավտոմեքենան, հաղորդում է ՀՀ ոստիկանության մամուլի ծառայությունը:

Վանաձոր քաղաքում ավտոմեքենան իջեցրել են քարշակից, նշված անձինք գնացել են գումար բերելու, սակայն չեն վերադարձել՝ չվճարելով պայմանավորված 220 դոլարը, այդ կերպ և վստահությունը չարաշահելով՝ իրեն պատճառել են գույքային վնաս:

Ձեռնարկված միջոցառումներով Վանաձորի Վարդանանց փողոցից երիտասարդներից մեկը բերման է ենթարկվել ոստիկանության Տարոնի բաժին, իսկ մյուսը ներկայացել է ինքնակամ. նրանք տվել են խոստովանական բացատրություններ:

Նախապատրաստվում են նյութեր:–0–