Քաղաքացին առևանգած մեքենայով վթարի է ենթարկվել (ՎԻԴԵՈ)
18:23
03 Հոկտեմբերի 2019
ԵՐԵՎԱՆ, 3 հոկտեմբերի. /Նովոստի-Արմենիա/. Քաղաքացին ալկոհոլի ազդեցության տակ առևանգել է մեքենա և վթարի ենթարկվել:
Ինչպես հայտնում է ՀՀ ոստիկանության մամուլի ծառայությունը, հոկտեմբերի 1-ին, ժամը 21.30-ի սահմաններում, ոստիկանության Մարտունու բաժնում մի քաղաքացի հաղորդում էր տվել, որ ժամը 21-ին անհայտ անձը Մարտունի քաղաքի Երևանյան փողոցից, առևանգել է «Նիսսան Տիդա» մակնիշի իր մեքենան:
Հաղորդումից րոպեներ անց, ձեռնարկված անհետաձգելի որոնողական աշխատանքների արդյունքում, ոստիկանները տեղեկություններ ստացան, որ գողացված տրանսպորտային միջոցը Մարտունի-Վարդենիս-Քարվաճառ ճանապարհով երթևեկելիս բախվել է Իջևանի մի բնակչի «Տոյոտա Քեմրի» մակնիշի մեքենային`պատճառելով նյութական վնաս:
«Ավելի ուշ, հենց վթարի վայրում, իրավապահները պարզեցին, որ «Նիսսան»-ը, ալկոհոլի ազդեցության տակ, առևանգել է Մարտունու Պռոշյան փողոցի 29-ամյա մի բնակիչ, որը բուժհաստատություն տեղափոխվելուց և հետազոտվելուց հետո, բերման է ենթարկվել ոստիկանության Մարտունու բաժին», - նշվում է տարածած հաղորդագրությունում: