Խոշոր ավտովթար Տավուշում. 3 վիրավորների թվում պայմանագրային զինծառայող կա

ԵՐԵՎԱՆ, 21 փետրվարի. /Նովոստի–Արմենիա/. Այսօր՝ փետրվարի 21-ին, խոշոր ավտովթար է տեղի ունեցել Տավուշի մարզում:

Ժամը 13:40-ի սահմաններում Երևան-Իջևան ավտոճանապարհի 105 կմ հատվածում բախվել են Երևան քաղաքի Գրիբոյեդովի փողոցի բնակիչ, 36-ամյա Վահան Լազյանի վարած Toyota մակնիշի և Տավուշի մարզի Բերդ քաղաքի Խորենացու փողոցի բնակիչ, 39-ամյա Հրաչ Մկրտումյանի վարած ՈւԱԶ 3962 մակնիշի ավտոմեքենաները, հաղորդում է shamshyan.com–ը։

Վթարի հետևանքով 2 վարորդներն ու ՈւԱԶ-ի ուղևոր, Բերդ քաղաքի Նելսոն Ստեփանյան փողոցի բնակիչ, 43-ամյա Ռազմիկ Ծատուրյանը մարմնական վնասվածքներով հոսպիտալացվել են:

Փաստի առթիվ նյութեր են նախապատրաստվում:

Կայքի տեղեկություններով՝ վթարված ՈւԱԶ-ը պատկանում է Բերդի բժշկական կենտրոնին, իսկ նրա ուղևոր՝ հիվանդանոց տեղափոխված Ռ. Ծատուրյանը ծառայում է ՀՀ ՊՆ N զորամասում՝ որպես պայմանագրային զինծառայող:-0-