Երևանում հրդեհված կահույքի արտադրամասում շուրջ 500 քմ տարածք է այրվել (ՖՈՏՈ)

ԵՐԵՎԱՆ, 4 հուլիսի. /Նովոստի-Արմենիա/. Երևանի կահույքի արտադրամասերից մեկում այսօր բռնկված հրդեհը մարվել է:

ՀՀ ԱԻՆ մամուլի ծառայության տեղեկատվության համաձայն, ժամը 13:17-ին ահազանգ է ստացվել, որ հրդեհ է բռնկվել Երևան քաղաքի Գուրգեն Մահարու փողոցում գտնվող կահույքի արտադրամասում, անհրաժեշտ է փրկարարների օգնությունը:

Դեպքի վայր է մեկնել 8 մարտական հաշվարկ, ճգնաժամային կառավարման ազգային կենտրոնի արագ արձագանքման և օպերատիվ խմբերը:

Հայտարարվել է հրդեհի բարդության «Բիս 1» աստիճան:

Հրդեհը մեկուսացվել է ժամը 14:11-ին, մարվել՝ 14:41-ին:

Պարզվել է, որ կահույքի արտադրամասում այրվել է ներկման և հղկման տարածքի մոտ 200 քմ հատվածը, պահեստը՝ ամբողջությամբ (մոտ 300 քմ) և 11 հաստոց:

Դեպքի վայրում են գտնվել ՀՀ ԱԻՆ Երևան քաղաքի փրկարարական վարչության պետ, ՓԾ տնօրենի տեղակալ փ/ծ գեներալ-մայոր Ն. Նազարյանը և ՃԿԱԿ պետի տեղակալ-ԱԻԱԲ պետ փ/ծ գնդապետ Ա․ Ոսկանյանը:-0-