Ավտովթար Երևան -Երասխ ավտոճանապարհին. մեքենան մխրճվել է երկաթե արգելապատնեշի մեջ

ԵՐԵՎԱՆ, 20 հոկտեմբերի. /Նովոստի Արմենիա/. Նախօրեին խոշոր ավտովթար է տեղի ունեցել Արարատի մարզում։

Ժամը 23:30-ի սահմաններում Արարատի մարզի Ազատավան գյուղի բնակիչ 40-ամյա Արտյոմ Մարգարյանը իր վարած KIA մակնիշի 91 UC 900 համարանիշի ավտոմեքենայով Երևան -Երասխ ավտոճանապարհի 11-րդ կմ հատվածում՝ դեպի Արտաշատ ընթանալիս, դուրս է եկել ճանապարհի երթևեկելի գոտուց դեպի բաժանարար ձախ գոտի և մխրճվել երկաթե արգելապատնեշի մեջ:

Օպերատիվորեն դեպքի վայր են ժամանել Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ծառայողները՝ դասակի հրամանատար Սանասար Հարությունյանի գլխավորությամբ: Օպերատիվորեն ժամանել են նաև Արտակարգ իրավիճակների նախարարության Փրկարար ծառայության Մասիսի հրշեջ-փրարակարակ ջոկատը՝ 1 մարտական հաշվարկով:

Փրկարարները հոսանքազրկել են ավտոմեքենան, փակել գազաբալոնը, որից հետո քաղաքացիների օգնությամբ ավտոմեքենան ճոպանի միջոցով դուրս են բերել երկաթե արգելեպատնեշի մեջ մխրճված վիճակից, այնուհետև հետաքննիչի հանձնարարականով ավտոմեքենան տեղափոխվել է Ոստիկանության Մասիսի բաժնի պահպանվող հատուկ տարածք: –0–