Ավստրալիայի վարչապետը ոչ սթափ վիճակում տակնուվրա է արել սեփական աշխատասենյակը

ԵՐԵՎԱՆ, 19 հոկտեմբերի. /Նովոստի–Արմենիա/. Ավստրալիայի վարչապետ Թոնի Էբոթն իր կուսակիցների հետ միասին տակնուվրա է արել սեփական ծառայողական գրասենյակը, գրում է բրիտանական The Times–ը։

Ըստ The Times–ի` դեպքը տեղի է ունեցել սեպտեմբերի 14–ին, սակայն մանրամասները հրապարակվել են Ավստրալիայի խորհրդարանում միայն այսօր` հոկտեմբերի 19–ին։

Ամեն ինչ բացահայտվել է այն բանից հետո, երբ կառավարության անդամների կազմակերպած երեկույթի ավարտից հետո հավաքարարները հայտնաբերել են Էբոթի գրասենյակի մարմարե սեղանի կտորները։ Բացի այդ, պարզվել է, որ Էբոթի սեղանին դրված բրոնզե ծաղկամանի վրա ճեղքեր են հայտնվել։ Այս փաստերով սկսվել է խորհրդարանական քննություն, հաղորդում է tvzvezda.ru–ն։

Խորհրդարանական ծառայությունների վարչության ներկայացուցիչ Ռոբ Բարնսն այս միջադեպի նպատակով կազմակերպված լսումների ժամանակ բացատրել է, որ «սեղանը, հավանաբար, վնասել են այն մարդիկ, ովքեր կանգնել կամ պարել են նրա վրա»։

The Times–ի տվյալներով` Էբոթի կառավարության նախկին նախարար  Ջեյմի Բրիգսին երեկույթի հաջորդ օրը տեսել են հաշմանդամի սայլակում նստած, քանի որ նա ընկել է սեղանի վրայից և չի կարողացել քայլել։ Սակայն Բրիգսն ամեն ինչ հերքել է։

Բացի այդ, հրատարակությանը հայտնի է դարձել, որ իր հրաժարականի օրը Թոնի Էբոթը պարել է` մերկացնելով մարմնի վերևի հատվածը։

Թոնի Էբոթը զբաղեցրել է Ավստրալիայի վարչապետի պաշտոնը 2013 թ.–ի սեպտեմբերից մինչև 2015 թ.–ի սեպտեմբեր։ Նա ստիպված է եղել հրաժարական տալ, քանի որ պարտություն է կրել Լիբերալ կուսակցության նախագահի պաշտոնի համար կազմակերպված ընտրություններում` զիջելով այն իր մրցակցին` Մալքոմ Թերնբուլին։ –0–