Արտակարգ դեպք Երևանում. բնակարաններից մեկի պատշգամբը փլուզվել ու թափվել է ներքևի պատշգամբի վրա

ԵՐԵՎԱՆ, 11 մայիսի./Նովոստի–Արմենիա/. Երեկ՝ մայիսի 10-ին, արտակարգ դեպք է տեղի ունեցել Երևանում:

Ժամը 22:20-ի սահմաններում Արտակարգ իրավիճակների նախարարության Փրկարար ծառայության օպերատիվ կառավարման կենտրոն ահազանգ է ստացվել, որ Արցախի պողոտայի 1-ին շենքի պատշգամբներից մեկը փլուզվել և թափվել է ներքևի պատշգամբի վրա ու մայթին, հաղորդում է shamshyan.com–ը։

Բարեբախտաբար, ըստ նախնական տեղեկությունների, այդ պահին պատշգամբներից ոչ մեկում ու մայթին մարդ չի եղել:

Օպերատիվորեն դեպքի վայր են մեկնել ՀՀ ԱԻՆ փրկարարները, ովքեր վերամբարձ կռունկի օգնությամբ երկարատև աշխատանքներից հետո կարողացել են ամբողջովին քանդել պատշգամբները։ Դեպքի վայր են ժամանել նաև Ճանապարհային ոստիկանության աշխատակիցները, ովքեր դադարեցրել են ճանապարհի այդ հատվածի երթևեկությունը և կարգավորել այն:–0–