Երևանում որդին դանակով մի քանի անգամ հարվածել է ծնողներին, այնուհետև 6-րդ հարկից ցած նետվել

ԵՐԵՎԱՆ, 14 մայիսի. /Նովոստի–Արմենիա/. Մայիսի 13–ի երեկոյան արտակարգ դեպք է տեղի ունեցել Երևանում:

Ժամը 21:00-ի սահմաններում ոստիկանության Երևան քաղաքի վարչության օպերատիվ կառավարման կենտրոն ահազանգ է ստացվել, որ Քանաքեռ-Զեյթուն վարչական շրջանի Կարապետ Ուլնեցու փողոցի 2-րդ շենքի բակում վիրավոր քաղաքացի կա, հաղորդում է shamshyan.com–ը։

Քննիչները նշված շենքի 6-րդ հարկի 22-րդ բնակարանում դեպքի վայրի զննությամբ հայտնաբերել են բավականին շատ արյան հետքեր։ Արնանման հետքեր են հայտնաբերվել նաև վերելակից դուրս` միջանցքում։

Ոստիկաններն ու քննիչները միջանցքում հայտնաբերել են նաև ծռված դանակ, որի վրա կան արյան հետքեր:

Կայքի հաղորդմամբ, նշված բնակարանից «Սբ. Գրիգոր Լուսավորիչ» բժշկական կենտրոն են տեղափոխվել Սուրիկ Կանջինյանը և Գայանե Մազինյանը, իսկ շենքի մուտքի մոտից նույն բժշկական կենտրոն է տեղափոխվել Վլադիմիր Կանջինյանը:

Կայքի տեղեկություններով, Վլադիմիր Կանջինյանը Սուրիկ Կանջինյանի և Գայանե Մազինյանի որդին է, և կան տեղեկություններ, որ նա իր ծնողներին դանակի մի քանի հարված է հասցրել, որից հետո դուրս է եկել բնակարանից, եկել պատշգամբ և իրեն ցած նետել` ընկնելով «Toyota» մակնիշի ավտոմեքենայի վրա:

Հիվանդանոցից հայտնել են, որ երեք վիրավորներն էլ գտնվում են ծանր վիճակում:

Փաստի առթիվ ստեղծվել է քննչական խումբ։–0–