Տղամարդը աղջկա վստահությունը շահելու համար ներկայացել է որպես ԱԱԾ աշխատակից և խոշոր գումար հափշտակել
Pastinfo.am կայքի հաղորդմամբ, հանցագործը հափշտակության ծրագիրը կյանքի է կոչել նախ սկսելով Արարատի մարզի բնակչուհու հետ ծանոթությունից, ապա, վստահություն ներշնչելու համար, ներկայացել է որպես ԱԱԾ 7-րդ վարչության պետ:
Տղամարդը աղջկա հետ ծանոթացել է իբրև թե նրա հետ ամուսնանալու նպատակով, սակայն իրականում ամուսնացած է եղել:
Կայքի հաղորդմամբ, 2015թվականի հունիսից մինչև նույն թվականի օգոստոս ամիսն ընկած ժամանակահատվածում, տղամարդը, մոր համար անհրաժեշտ դեղահաբեր գնելու պատրվակով, սոցիալական ցանցով ծանոթացած աղջկանից մի քանի անգամ տարբեր չափերով գումար է հափշտակել՝ ընդհանուր առմամբ գումարը 130.000 ՀՀ դրամ է կազմել:
«Սակայն այսքանով տղամարդը չի բավարարվել և երբ տեղեկացել է, որ աղջկա մորաքրոջ դստեր տանը կա հնամաշ արժեքավոր կտավ, առաջարկել է այդ կտավը վաճառել», - նշվում է հաղորդագրության մեջ:
Ըստ մեղադրանքի՝ տղամարդը ընկերուհու հետ գնացել է այդ կտավը տեսնելու և, քանի որ կտավի վրա որոշ գունաթափված հատվածներ են եղել, դրանք վերանորոգելու և հետագայում վաճառելու, ապա գումարը վերադարձնելու պատրվակով, աղջկա վստահությունը չարաշահելու եղանակով, նրանից հափշտակել է 300. 000 ՀՀ դրամ արժողությամբ կտավը:
Պարբերականը նշում է, որ կտավը հափշտակելուց հետո էլ խզել է կապերը սոցցանցի միջոցով ծանոթացած աղջկա հետ և մոռացել է ամուսնության մասին խոստումը՝ ընդհանուր առմամբ խարդախությամբ աղջկանից հափշտակելով զգալի չափերի հասնող՝ 430.000 ՀՀ դրամի գույք:
Տղամարդուն մեղադրանք է առաջադրվել ՀՀ քրեական օրենսգրքի 178-րդ հոդվածի 1-ին մասով (Խարդախություն), նրա նկատմամբ որպես խափանման միջոց է ընտրվել կալանավորումը: -0-
