ԵՐԵՎԱՆ, 15 մարտի. /Նովոստի–Արմենիա/. Պեկինից Մելբուրն թռչող ինքնաթիռի ուղևորուհու մոտ թռիչքի ժամանակ պայթել են անլար ականջակալները։
Պայթյունի հետևանքով կինը ստացել է դեմքի և ձեռքերի այրվածքներ, հաղորդում է lenta.ru–ն` հղում անելով Ավստրալիայի տրանսպորտային անվտանգության վարչությանը (ATSB)։
Լուսանկարը` ATSB
Ուղևորուհին պատմել է, որ միջադեպը տեղի է ունեցել ինքնաթիռի օդ բարձրանալուց մոտ երկու ժամ անց, երբ նա քնած է եղել։ Պայթյունից կինն արթնացել է և ձեռքերով ծածկել դեմքը, ինչի հետևանքով ականջակալներն ընկել են նրա վզի վրա։ Վերջում նա ականջակալները պարզապես շպրտել է գետնին։
Ուղևորուհուն օգնության են հասել բորտուղեկցորդուհիները։ Նրանք ականջակալները դրել են ջրով լի դույլի մեջ, սակայն գաջեթի որոշ դետալները հալել և կպել են ինքնաթիռի հատակին։ Ինչպես նշվում է, ողջ չվերթի ընթացքում ինքնաթիռում զգացվել է վառած պլաստիկի և խանձած մազերի հոտ։
ATSB–ի նախնական տվյալներով, միջադեպի պատճառը ականջակալների մարտկոցի բռնկումն է եղել։–0–