ԵՐԵՎԱՆ, 12 հուլիսի. /Նովոստի-Արմենիա/. Երևանում օրերս վնասազերծվել է քիլերների մի ամբողջ ջոկատ, որոնք պատրաստվում էին գնդակահարել հայտնի գործարարների և օլիգարխների, գրում է «Չորրորդ իշխանություն» թերթը:
«Վնասազերծումը չի իրականացվել իրավապահ մարմինների ջանքերով: Քիլերները՝ զինված և դիմակավորված, հայտնաբերվել և վնասազերծվել են մեզ դեռևս անհայտ մարդու թիկնազորի ջանքերով», - հաղորդում է պարբերականը:
Թերթի տվյալներով, դեպքերը ծավալվել են Էրեբունի համայնքում` «Արգիշտի» ռեստորանի հարակից տարածքում: «Հուլիսի 8-ին երկրի մի շարք կարկառուն դեմքեր, օրենքով գողեր և այլ հայտնի ֆիգուրներ, այդ թվում, ԱԺ պատգամավորներ Մհեր Սեդրակյանը, Սամվել Ալեքսանյանը, ինչպես նաև Ռուբեն Հայրապետյանը, մասնակցել են քրեական աշխարհում հայտնի հեղինակության Վստրեչի Ապերի հոր քառասունքին: Հոգեհացի արարողությունն իրականացվել է «Արգիշտի» ռեստորանային համալիրում: Հենց այնտեղ էլ հայտնի է դարձել, որ ռեստորանի հարևանությամբ դարանակալվել են քիլերների ջոկատները: Չարագործները չեն հասցրել գործի անցնել, երբ հոգեհացի մասնակիցներից մեկի թիկնազորի ներկայացուցիչներին կասկածելի են թվացել այն ավտոմեքենաները, որոնց մեջ տեղավորված է եղել քիլերների 7-8 հոգանոց խումբը: Ջոկատը հայտնաբերվել և վնասազերծվել է», - նշվում է հաղորդագրության մեջ: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում