ԵՐԵՎԱՆ, 8 հունվարի./Նովոստի-Արմենիա/. Նախօրեին՝ հունվարի 7-ին խոշոր ու ողբերգական ավտովթար-հրդեհ է տեղի ունեցել Գեղարքունիքի մարզում։
Shamshyan.com-ի հաղորդմամբ, ժամը 16։10-ի սահմաններում Սևան-Մարտունի-Գետափ ավտոճանապարհի Ներքին Գետաշեն գյուղի վարչական տարածքում բախվել են Opel և ՎԱԶ 21703 մակնիշի ավտոմեքենաները։
Բախման հետևանքով ավտոմեքենաներում հրդեհ է բռնկվել։
Հրշեջները մարել են ավտոմեքենաներում առաջացած հրդեհը, ապա հատուկ տեխնիկաների միջոցով 6 մոխրացած դիեր դուրս են բերել ավտոմեքենաներից։
Վթարի փաստով Մարտունու քննչական բաժնում նախաձեռնվել է քրեական վարույթ։
Կայքի տեղեկություններով, ոստիկաններն ու քննիչները պարզել են` ՎԱԶ 21703-ը վարել է Գեղարքունիքի մարզի Լիճք գյուղի բնակիչ 23-ամյա Ն. Կնյազյանը, իսկ Opel-ը վարել է Գեղարքունիքի մարզի Վարդենիկ գյուղի բնակիչ 33-ամյա Ա. Աբրոյանը։
Ավտովթար-հրդեհի հետևանքով վերջիններս և Ն․ Կնյազյանի ուղևոր՝ Գեղարքունիքի մարզի Լիճք գյուղի բնակիչ 32-ամյա Կ. Իրիցյանը և Ա․ Աբրոյանի ուղևորներ՝ Գեղարքունիքի մարզի Վարդենիկ գյուղի բնակիչներ 30-ամյա Ա. Շախնազարյանը, 8-ամյա Ն. Աբրոյանը և 5-ամյա Վ. Աբրոյանը տեղում մահացել են։
Կայքի տեղեկություններով Opel-ի ուղևորները Opel-ի վարորդի կինն ու երեխաներն էին։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
