ԵՐԵՎԱՆ, 17 մարտի./Նովոստի–Արմենիա/. Նախօրեին՝ մարտի 16-ին, մահվան ելքով վրաերթ է տեղի ունեցել Երևան-Սևան ավտոճանապարհի Աճառյան փողոցում:
Shamshyan.com–ի հաղորդմամբ, ժամը 22:00-ի սահմաններում անհայտ մակնիշի և համարանիշի ավտոմեքենայի վարորդը վրաերթի է ենթարկել հետիոտնին, և թողնելով անօգնական, դիմել փախուստի:
Վրաերթի ենթարկվածը տեղում մահացել է:
Փաստի առթիվ քննիչ հարուցվել է քրեական գործ ՀՀ ՔՕ 242 հոդվածի 2-րդ մասի հատկանիշներով:
Կայքի հաղորդմամբ, մի քաղաքացի ահազանգել է Երևանի ՃՈ օպերատիվ կառավարման կենտրոն և հայտնել, որ վրաերթն ինքն է կատարել, իր կողմից վարած Nissan մակնիշի ավտոմեքենայով և ավտոմեքենան գտնվում է ավտոտնակում:
Երևանի ՃՈ պետի գլխավորությամբ ոստիկանները հայտնաբերել են նշված ավտոմեքենան, որը Nissan X-Trail մակնիշի է, վարորդն էլ Երևան քաղաքի Արաբկիր վարչական շրջանի բնակիչ 57-ամյա Ալեքսանդր Ֆարամազյանն է: Նա տեղում ենթարկվել է սթափության փորձաքննության, պարզվել է, որ նա գտնվում է խմածության ամենաբարձր աստիճանի:
Կայքի տեղեկացմամբ, Ֆարամազյանը ոստիկաններին հայտնել է, որ ինքը խմել է դեպքից հետո, քանի որ վախեցել է և ծանր է տարել տեղի ունեցածը:
Կայքի տեղեկություններով, քննիչ որոշմամբ Ա. Ֆարամազյանը ձերբակալվել է:–0–