ԵՐԵՎԱՆ, 2 դեկտեմբերի. /Նովոստի-Արմենիա/. Արկտիկայի կլիման նոր՝ ավելի տաք փուլ է թևակոխում, որի դեպքում հալչելուց մգացող սառույցներն ավելի շատ արևային ռադիացիա են կլանելու, իսկ տունդրայի բուսականության մակերեսը կավելանա օդի բարձր ջերմաստիճանի պատճառով, նշվում է Արկտիկայի վիճակի մասին ամենամյա զեկույցում, որը տեղադրված է ԱՄՆ-ի օվկիանոսային և մթնոլորտային ուսումնասիրությունների ազգային վարչության (NOAA) կայքում:
«Նկատվում է արկտիկական ծովային սառույցների և ձյունածածկ տարածքների մգացում, որոնք սովորաբար սպիտակ գույնի են: Սպիտակ ձյունն ու սառույցն արտացոլում են արևային ռադիացիան, սակայն հալչելու պատճառով մգացող Արկտիկան ամռանը կլանում է այդ ռադիացիան... Արկտիկական տարածքների օդի ջերմաստիճանը, ընդհանուր առմամբ, բարձրանում է, և նման պայմաններում տունդրայի բուսականության քանակը կավելանա», - նշվում է զեկույցում, հաղորդում ՌԻԱ Նովոստին:
Զեկույցում նաև նշվում է, որ Արկտիկան, ըստ երևույթին, կլիմայական նոր փուլ է թևակոխում, որը բնորոշվում է օդի ջերմաստիճանի բարձրացմամբ, օվկիանոսի քիմիական գործընթացների փոփոխությամբ, ծովային սառույցների մակերեսի ակտիվ կրճատմամբ:
Գիտնականների կարծիքով՝ շրջակա միջավայրի նմանատիպ փոփոխություններն անպայման ինչպես ծովային, այնպես էլ վերգետնյա էկոհամակարգերի փոփոխությունների կհանգեցնեն: Կնվազեն սպիտակ արջերի և ծովափղերի բնակության համար նախատեսված վայրերը, սակայն կետերի համար սննդի բազան կբարելավվի:
«Նմանատիպ զեկույցները կօգնեն գտնել արկտիկական պաշարների օգտագործման և պահպանման հարցում լավագույն լուծումները, քանի որ հասանելիության ավելացման դեպքում նրանց նկատմամբ պահանջարկը ավելանում է», -ասել է NOAA-ի ղեկավարի տեղակալ Մոնիկա Մեդինան:-0-
