Ֆրանսիայի առաջին տիկին Կառլա Բրունի-Սարկոզին ժամանել է «Լա Մյուետ» փարիզյան կլինիկա, որտեղ չորեքշաբթի պետք է ընթանա ծննդաբերությունը, հաղորդում է BFM TV ֆրանսիական լրատվական հեռուստաալիքը՝ հղում անելով անանուն աղբյուրներին:
«Հավաստի տվյալներով, Կառլան այսօր առավոտից կլինիկայում է: Գիտենք, որ ծննդաբերությունն այսօր է ընթանալու: Հիվանդանոցի շուրջ կրկնակի ավելացվել է ոստիկանական վերահսկողությունը»,- հայտնել է հեռուստաալիքի թղթակիցը, հաղորդում է ՌԻԱ Նովոստին:
Նախորդ շաբաթ ֆրանսիական ԶԼՄ-ներն ակտիվորեն քննարկում էին լուրերն այն մասին, թե Կառլա Բրունին արդեն ծննդաբերել է: Այդ լուրերը բազմիցս հայտնվել են Twitter սոցցանցում, Սարկոզիի ընտանիքում ավելացման թեմայով կատակում էին ֆրանսիացի ռադիոհաղորդավարները: Բայց առայսօր ազդեցիկ ԶԼՄ-ները որևէ հաստատող հաղորդագրություններ չեն հրապարակել այդ առիթով:
Լրագրողներն արդեն երկու շաբաթ հերթապահում են «Լա Մյուետի» մոտ, քանի որ նախագահի հայրը՝ Պալ Սարկոզին, ավելի վաղ հայտնել է, թե ծննդաբերությունը նախատեսված է հոկտեմբերի 3-ին:
Սարկոզին երեք որդի ունի երկու ամուսնություններից, իսկ նրա կինը՝ որդի՝ Ռաֆայել Էնթովենից, ում հետ սիրավեպ է ունեցել: Նա բազմիցս հասկացրել է, որ նախագահի համար երեխա է ցանկանում ունենալ: Դեռևս 2010 թվականին Սարկոզիի՝ Հնդկաստան կատարած պաշտոնական այցի ժամանակ առաջին տիկինը խնդրել է Թաջ Մահալի սպասավորին աղոթել, որպեսզի նա տղա ունենա: -0-
