ԵՐԵՎԱՆ, 29 օգոստոսի. /Նովոստի-Արմենիա/. Պահպանություն իրականացնող G4S բրիտանական մասնավոր ընկերության ղեկավարությունն աշխատանքից հեռացրել է երկու աշխատակցի, ովքեր էլեկտրոնային օղակն ամրացրել են տնային կալանքի դատապարտված Քրիստոֆեր Լոուքոքի (Christopher Lowcock) ոտքի պրոթեզի վրա: Դատապարտյալը հանել է այն և հեռացել տնից, երկուշաբթի հաղորդում է BBC հեռուստառադիոկորպորացիայի կայքը:
Թմրանյութեր պահելու, ճանապարհային երթևեկության կանոնները խախտելու և անօրինական կերպով զենք պահելու համար դատապարտված Լոուքոքը, պրոթեզի վրա բինտ կապելով, խաբել է պահպանության ծառայության աշխատակիցներին, հաղորդում է «ՌԻԱ Նովոստին»:
Աշխատակիցները հեռացվել են աշխատանքից «կարգապահության լուրջ խախտման համար»:
«Այս դեպքում ընթացակարգը հստակ չի կատարվել, և G4S-ը միջոցներ է կիրառել: Ամեն շաբաթ երկու հազար դատապարտյալի վրա էլեկտրոնային օղակներ են փակցվում, սակայն նման միջադեպերը շատ հազվադեպ երևույթ են», - հայտարարել է արդարադատության նախարարությունը:
Լոուքոքը Ռոչդեյլ քաղաքում գտնվող իր տնից փախուստի դիմելուց հետո կրկին ձերբակալվել է ճանապարհային երթևեկության կանոնները խախտելու համար:
Արդարադատության նախարարության հանձնարարությամբ գործող ընկերությունը մեկ տարվա ընթացքում էլեկտրոնային օղակներ է ամրացրել 70 հազար մարդու վրա, տեղեկացրել է G4S-ը:
«Այս դատապարտյալի հետ կապված միջադեպի դեպքում մեր աշխատակիցներն օղակն ամրացնելիս հրահանգները ճիշտ չեն կատարել: Եթե նրանք ամեն ինչ ճիշտ անեին, ապա կհասկանային, որ դա պրոթեզ է», - հայտարարել է ընկերությունը:-0-
