Օբաման վառել է Վաշինգտոնի գլխավոր տոնածառի լույսերը

ԱՄՆ նախագահ Բարաք Օբաման վառել է Վաշինգտոնի գլխավոր տոնածառի լույսերը, որը գտնվում է Սպիտակ տան դիմաց, հաղորդում է «ՌԻԱ Նովոստիի» թղթակիցը:

«Սուրբ Ծննդի պատմությունը քրիստոնեական է, սակայն միաժամանակ նրա դասը ընդհանուր է բոլորի համար», - նշել է Օբաման: Նախագահի խոսքերով՝ Սուրբ Ծնունդը, առաջին հերթին, հիշեցումն է այն բանի, որ մարդիկ պետք է սիրեն և խնայեն միմյանց, հոգ տանեն իրենց մերձավորների մասին:

«Այսօր մենք հիշում ենք հիասքանչ և միևնույն ժամանակ պարզ մի պատմություն: Պատմություն մի փոքրիկի մասին, որը ծնվել է տանից հեռու և ում ծնողները ղեկավարվում էին միայն հավատքով: Եվ այդ փոքրիկը ստեղծեց մի հավատ, որն ապրում է արդեն ավելի քան երկու հազար տարի և որի համաձայն՝ անկախ մեր ինքնությունից և ծննդյան վայրից՝ մենք բոլորս պետք է սիրենք միմյանց քրոջ  և եղբոր պես», - ընդգծել է ԱՄՆ նախագահը:

Նա մաղթել է ուրախ Սուրբ Ծնունդ, առաջին հերթին՝ զինծառայողներին, ովքեր ձմեռային տոները նշում են տանից հեռու:

«Մեր մտքերն ու աղոթքները նրանց հետ են, ովքեր այս տոներին տանից հեռու են, մայրերի և հայրերի, որդիների և դուստրերի հետ են մեր զինվորների, ովքեր ամեն օր վտանգում են իրենց կյանքը՝ հանուն մեր անվտանգության», - ասել է Օբաման:

«Մենք բոլորս՝ Միշելը, մեր դուստրեր Մալիան և Սաշան և իմ զոքանչ Ռոբինսոն Մայրիկը, ցանկանում ենք ձեզ երջանիկ Սուրբ Ծնունդ: Եվ այժմ ամենակարևորը՝  սեղմել կոճակն ու միացնել տոնածառի լույսերը, ինձ կօգնի Սաշան», - ասել է Օբաման:

Հաշվելով հինգից մինչև մեկը՝ ԱՄՆ նախագահն ու նրա ընտանիքի անդամները միասին սեղմեցին կոճակը, ինչից հետո տոնածառը շողշողաց լույսերով: «Ստացվեց», - ժպտալով՝ բացականչեց Օբաման:

Ազգային տոնածառի լույսերը վառելու արարողությունը տեղի է ունենում ԱՄՆ մայրաքաղաքում ամեն տարի՝ սկսած 1923 թվականից:

1978 թ.-ին Սպիտակ տան դիմաց տնկվել է 14-մետրանոց քոլորադյան կապույտ եղևնի, որը դարձել է Ազգային տոնածառը: Նրան շրջապատում են ավելի փոքր 56 եղևնիներ, որոնք խորհրդանշում են ԱՄՆ-ի բոլոր նահանգներն ու տարածքները:

Տոնածառի լույսերը վառելու հանդիսավոր արարողությունը «նախագահական» բազմաթիվ ավանդույթներից մեկն է, որը կապված է ամերիկացիների սիրելի տոնի՝ Սուրբ Ծնունդի հետ: Սպիտակ տան գրեթե գլխավոր ավանդույթներից է նաև թխվածքե Սպիտակ տան «կառուցումը»:Այս տարի 177 կգ քաշ ունեցող շոկոլադա- կոճապղպեղա-մարցիպանային շինության գլխավոր «ճարտարապետը» նախագահական շեֆ-խոհարար Բիլ Յոսեսն է:-0-