Պաբլո Պիկասոյի գլուխգործոցները կներկայացվեն Լոնդոնում կայանալիք ցուցահանդեսում
ХХ դարի հայտնի նկարիչ Պաբլո Պիկասոյի գլուխգործոցների ցուցահանդեսը կբացվի չորեքշաբթի Լոնդոնի Ազգային պատկերասրահում։
Սա Պիկասոյի արվեստին ամբողջովին նվիրված առաջին ցուցահանդեսն է եվրոպական արվեստի մեջ մասնագիտացող պատկերասրահի պատմության մեջ: Ցուցադրության մեջ, ընդհանուր առմամբ, ներառված է նկարչի շուրջ 60 աշխատանք, որոնք բերվել են աշխարհի տարբեր երկրների՝ Ֆրանսիայի, Իսպանիայի, Շվեյցարիայի, ԱՄՆ-ի և այլ երկրների թանգարաններից և մասնավոր հավաքածուներից։
Ցուցահանդեսի գլխավոր թեման՝ «Պիկասո. մարտահրավեր նետելով անցկալին», եվրոպացի հնագույն վարպետների՝ Վելասկեսի, Ռեմբրանդտի, Գոյայի և նրան անմիջականորեն նախորդած իմպրեսիոնիստների՝ Սեզանի, Գոգենի, Վան Գոգի աշխատանքներում Պիկասոյի գաղափարների և նկարների սյուժեների աղբյուրների որոնումը դարձավ։
«Պիկասոն վերափոխել է անցյալի արվեստն ամբողջովին այլ բանի՝ ստեղծելով սեփական խիզախ նկարները։ Հաճախ անցյալից արված նրա «մեջբերումները» ուղղակի են, երբեմն՝ ավելի այլաբանական և երբեմն՝ լի պարոդիայով և անհարգալից վերաբերմունքով», - պատմել են ցուցահանդեսի համակարգողները։
Օրինակ, Պիկասոյի «Ծղոտե գլխարկով տղամարդը պաղպաղակը ձեռքին» ինքնադիմանկարը (1938) հանդիսատեսի հիշողության մեջ արթնացնում է ֆլամանդացի գեղանկարիչ Յան վան Էյկի «Տղամարդու դիմանկարը» աշխատանքը, որը ստեղծվել է հինգ դար առաջ։ Իսկ Պիկասոյի կողմից 1969 թ.-ին ստեղծված «Հրացանակրի գլուխը» (Կարդինալ Ռիշելյե) նկարը 1642 թ.-ին Ֆիլիպ դե Շամպենի կողմից ստեղծած հայտնի կարդինալի դիմանկարի եռակի նախօրինակն է։
Նկարիչների աշխատանքներից շատերը, որոնցից Պիկասոն ներշնչանք է ստացել և որոնք փորձել է վերաիմաստավորել պատկերավոր արվեստի մեջ նոր ավանդույթների համաձայն, ցուցահանդեսի այցելուները կկարողանան տեսնել Ազգային պատկերասրահի հիմնական ցուցադրություններում։
«Ցուցահանդեսի այցելուները կարող են կրկին իրենց համար բացահայտել պատկերասրահի հավաքածուն և հասկանել դրա վերափոխումը Պիկասոյի աչքերով», - պարզաբանում են համակարգողները։
«Պիկասո. մարտահրավեր նետելով անցյալին» ցուցահանդեսը կգործի Տրաֆալգարյան հրապարակում գտնվող Ազգային պատկերասրահում մինչև այս տարվա հունիսի 7-ը։
Մասշտաբային ցուցահանդեսի բացման կապակցությամբ պատկերասրահի շենքը դարձել է ինքնատիպ «շրջանակ» Պիկասոյի կտավների համար։ Երեկոյի ընթացքում շենքի ճակատամասին ցուցադրվում են նկարչի աշխատանքների վերարտադրված տարբերակները՝ ներկելով պատերն ու սյունները տարբեր գույներով և գրավելով անցորդների և զբոսաշրջիկների ուշադրությունը։-0-
