Թուրքերը մուրճերով հարձակվել են Ֆրանսիայում հայ ցուցարարների վրա․ կան տուժածներ (ՎԻԴԵՈ)

ԵՐԵՎԱՆ, 28 հոկտեմբերի․ /Նովոստի-Արմենիա/․ Թուրքերը մուրճերով հարձակվել են Ֆրանսիայում Արցախին աջակցող խաղաղ ակցիայի հայ մասնակիցների վրա, կան տուժածներ:

Ֆրանսիայում հայերը երկկողմանի փակել են Ֆրանսիայի A7 մայրուղին: Նրանց նպատակն է Ֆրանսիայի ուշադրությունը հրավիրել Արցախում Ադրբեջանի և Թուրքիայի կողմից սանձազերծված ռազմական գործողություններին։ 

«Եթե հարկ լինի՝ կփակենք օդանավակայաններ, մեր ձայնը պետք է լսելի դարձնենք Ֆրանսիային»,- նշում են նրանք:

Որոշ ժամանակ անց հինգ մարդ մուրճերով և մահակներով դուրս են եկել մեքենաներից, որոնք ակցիայի պատճառով կանգնած էին խցանման մեջ և հետևից հարձակվել ցուցարարների վրա: Հայերից մեկը գլխի շրջանում լուրջ վնասվածք է ստացել և հոսպիտալացվել է, մի քանի հոգի թեթև վնասվածքներ են ստացել: Ակցիայի մասնակիցները հասել են երեք հարձակվողներին, նետել նրանց գետնին և ոստիկանություն կանչել:Ճանապարհի մի մասը բացվել է շտապօգնության և ոստիկանության համար: Ցուցարարները ոստիկանությանը հարձակման մասին վիդեո ապացույցներ են ներկայացրել:

Ավելի ուշ պարզվեց, որ թուրքերը հավաքված են եղել ճանապարհի մի հատվածում, բայց ոստիկանությունը նրանց թույլ չի տվել մոտենալ ցուցարարներին: Դեպքի վայր ժամանած պարեկները երթուղու մի մասով երթևեկություն են բացել, որպեսզի տարածություն բացեն փրկակարական ուղղաթիռի համար։-0-