Սեփական աղջիկների կողմից սպանված Միխայիլ Խաչատուրյանը մեղավոր է ճանաչվել նրանց նկատմամբ բռնություն գործադրելու համար
ԵՐԵՎԱՆ, 21 ապրիլի․/Նովոստի–Արմենիա/․ Մոսկվայի Բուտիրսկի դատարանը հրապարակել է Միխայիլ Խաչատուրյանի քրեական գործով վերջնական վճիռը՝ նրան հետմահու մեղավոր ճանաչելով դուստրերի նկատմամբ ծանր մարմնական վնասվածք հասցնելու և սեռական բռնության մեջ։ Ինչպես հայտնում է ՏԱՍՍ-ը, Խաչատուրյանի գործով քրեական հետապնդումը դադարեցվել է նրա մահվան պատճառով։
«Դատարանը որոշել է Միխայիլ Խաչատուրյանին մեղավոր ճանաչել բոլոր կետերով, նրա նկատմամբ հարուցված քրեական գործը դադարեցնել մահվան պատճառով»,- ասված է վճռում։
Դատական վճռի հրապարակման ժամանակ, բացի պաշտպանական կողմից, նիստերի դահլիճում ներկա էին Խաչատուրյանի դուստրերից երկուսը։
Խաչատուրյան քույրերի պաշտպանական թիմը գոհ է իրենց հոր նկատմամբ դատարանի որոշումից։ Այս որոշումը վկայում է այն մասին, որ աղջիկները գործել են ինքնապաշտպանական նպատակով։
Ավելի վաղ պետական մեղադրող կողմը Բուտիրսկի դատարանին խնդրել էր ապացուցված ճանաչել Խաչատուրյանի մեղքը և դադարեցնել քրեական հետապնդումը նրա մահվան կապակցությամբ։
Միխայիլ Խաչատուրյանը սպանվել է 2018 թվականի հուլիսի 27-ին, երեք դուստրերը դանակով և մուրճով բազմաթիվ հարվածներ են հասցրել նրան։ Աղջիկների գործողությունները հետաքննության կողմից որակվել են որպես սպանություն, որը կատարվել է մի խումբ անձանց կողմից նախնական դավադրության արդյունքում։ Կրտսեր քրոջը վերաբերող նյութերն առանձնացվել են հիմնական գործից, քանի որ հանցագործության պահին նա անմեղսունակ է եղել։
