«Հիսուսը փրկում է» գրառմամբ վազորդը սրտի տագնապ է ունեցել. նրան փրկել է Հիսուս անունով տղամարդ

ԵՐԵՎԱՆ, 25 հոկտեմբերի. /Նովոստի–Արմենիա/. ԱՄՆ–ի Միենապոլիսում հոկտեմբերի սկզբին անցկացվել է Twin Cities Marathon մարաթոնը, գրում է m.sports.ru–ն` հղում անելով twincities.com–ին։

Մասնակիցներից մեկը` 25–ամյա Թայլեր Մունը, վազքուղի է դուրս եկել «Հիսուսը փրկում է» գրառմամբ շապիկով։ Մունի խոսքով, ինքն ընտրել է այդ արտահայտությունը` ընդգծելու համար, որ քրիստոնեություն է դավանում։

Մարաթոնի ժամանակ Մունը սրտի տագնապ է ունեցել և կորցրել է գիտակցությունը։

Վազքարշավի մասնակիցներից մեկը, ով բժշկական կրթություն ուներ, անեսթեզիոլոգի օգնական Հիսուս Բուենոն սկսել է սրտի մերսում և արհեստական շնչառություն կատարել` պայքարելով Մունի կյանքի համար 10 րոպեի ընթացքում, մինչև որ ժամանած բժիշկները դեֆիբրիլատորի օգնությամբ աշխատացրել են վազորդի սիրտը։

Ներկայում Մունը շարունակում է վերականգնվել։ Նա հայտարարել է, որ շապիկի գրառումը մարգարեական է, և մտադիր է մասնակցել 2020 թվականի վազքարշավին։ -0-