ԵՐԵՎԱՆ, 5 փետրվարի. /Նովոստի-Արմենիա/. «Արբիդոլը» (ունիֆերովիր) և դարունավիրը կարող են արդյունավետ լինել նոր կորոնավիրուսի բուժման մեջ, այդպիսի կարծիք է արտահայտել ՉԺՀ-ի Առողջապահության ազգային հանձնաժողովի խորհրդական, համաճարակաբան Լի Լանցզյուանը: Այս մասին հայտնում է «Վեդոմոստին »՝ հղում անելով South China Morning Post-ին:
Ըստ Լի Լանցզյուանի, նախնական թեստերը ցույց են տվել, որ ունիֆենովիրը և դարունավիրը կարող են արդյունավետորեն կանխել վիրուսի զարգացումը: «Արբիդոլը» հայտնի է որպես հակավիրուսային միջոց, դարունավիրը օգտագործվում է ՄԻԱՎ-ի բուժման մեջ: Նա նաև պատրաստվում է խորհուրդ տալ, որ Առողջապահության ազգային հանձնաժողովը ներառի այս երկու դեղամիջոցները չինական հիվանդանոցների համար կորոնավիրուսային ինֆեկցիայի բուժման նորացված ծրագրում:
Չինաստանում մարդու և կենդանիների նոր կորոնավիրուսների բուժման համար փորձարկված այլ դեղամիջոցներ են ՝ ռեմդեզիվիրը, խլորոխինը և ֆավիպիրավիրը, հայտնել է Չինաստանի գիտության և տեխնոլոգիաների նախարարության կենսաբանական կենտրոնի գործադիր տնօրեն Սուն Յանժոնգը:
Չինական իշխանությունների տվյալներով ՝ փետրվարի 4-ի առավոտյան Չինաստանում նոր տիպի կորոնավիրուսով պայմանավորված թոքաբորբից մահացել է ավելի քան 400 մարդ, վարակվածների թիվը գերազանցել է 20.400-ը:
Ներկայումս չկա որևէ ապացույց 2019-nCoV-ի որևէ դեղամիջոցի օգտագործման արդյունավետության մասին, ասվում է Ռուսաստանի Առողջապահության նախարարության ժամանակավոր ուղեցույցի մեջ: Նոր կորոնավիրուսով հիվանդների բուժման համար օգտագործվում են մի շարք դեղեր, որոնք օգտագործվել են SARS-CoV-ի և MERS-CoV կորոնավիրուսների անցած բռնկումների ժամանակ. Ռիբավիրին, լոպինավիր + ռիտոնավիր և ինտերֆերոնի պատրաստուկներ: -0-