ԵՐԵՎԱՆ, 9 մարտի./Նովոստի-Արմենիա/. Հատուկ նշանակության ջոկատը, օգտագործելով ջրցաններ և արցունքաբեր գազ, հեռացրեց ցուցարարներին Թբիլիսիի խորհրդարանի շենքի մոտից: Կան բերման ենթարկվածներ:
Ցուցարարները փորձեցին կոտրել մետաղական ցանկապատերը և հասան խորհրդարանի շենքի դարպասներին, նրանք կոտրում էին ապակիներ և շենքի ուղղությամբ ճայթրուկներ նետում:
Ըստ
ՏԱՍՍ-ի, բողոքի ցույցը սկսվել է Թբիլիսիում ցերեկը, ցուցարարները բողոքում են խորհրդարանի կողմից օտարերկրյա գործակալների մասին օրինագծի ընդունման դեմ: Մի քանի ժամ անց ընդդիմադիր քաղաքական գործիչ Գեորգի Վաշաձեն կոչ արեց ցուցարարներին հավաքվել խորհրդարանի շենքի մոտ և թույլ չտալ, որպեսզի մարտի 9-ին պատգամավորները մտնեն խորհրդարան:
Մարտի 7-ին Վրաստանի խորհրդարանն առաջին ընթերցմամբ ընդունեց օտարերկրյա գործակալների մասին օրինագծի վրացական տարբերակը: Խորհրդարանի նիստին զուգահեռ շենքի մոտ հավաքվել էին օրինագծի դեմ բողոքող հազարավոր ցուցարարներ: Ւրավիճակը սրվեց, երբ պատգամավորները կողմ քվեարկեցին փաստաթղթին: Բողոքի ակցիան ցրելու համար հատուկ ուժերը կիրառեցին արցունքաբեր գազ և ջրցանները:
Փետրվարին Վրաստանի խորհրդարանում գրանցվեց օտարերկրյա գործակալների մասին օրինագծի երկու տարբերակ `վրացական և ամերիկյան, որն ամերիկյան օրենքի թարգմանությունն է արտասահմանյան գործակալների գրանցման մասին: Ըստ վրացական տարբերակի, լրատվամիջոցները ևս կարող են լինել օտարերկրյա գործակալներ, մինչդեռ նախաձեռնությունը չի վերաբերում ֆիզիկական անձանց: Ամերիկյան տարբերակը վերաբերում է ոչ միայն իրավաբանական, այլև ֆիզիկական անձանց, այն նաև նախատեսում է քրեական պատասխանատվություն: Վրաստանի խորհրդարանը վրացական տարբերակն արդեն ուղղարկել Վենետիկի հանձնաժողով՝ փորձաքննության:-0-
