ԵՐԵՎԱՆ, 13 հուլիսի./Նովոստի–Արմենիա/. Հուլիսի 11–ին անգլիացի գործարար Ռիչարդ Բրենսոնը սեփական թռչող սարքով հասել է տիեզերքի սահման։
Ինչպես հաղորդում է ՏԱՍՍ–ը, Unity տիեզերանավը բարձրացել է 86 կմ բարձրության վրա, թռիչքը տևել է մոտ մեկ ժամ։ Ուղևորները գտնվել են անկշռելիության մեջ ընդամենը մի քանի րոպե։ Թռիչքի ժամանակ եղել է ուղիղ հեռարձակում։
Բրենսոնը տիեզերքից ուղերձ է հղել։
«Դիմում եմ ներքևում գտնվող բոլոր երեխաներին։ Ես էլ ժամանակին երեխա էի, երազում էի և նայում աստղերին։ Հիմա ես մեծ մարդ եմ` տիեզերանավում։ Հիանալի մարդկանց հետ նայում եմ ներքև` մեր հիանալի մոլորակին։ Երազողների հաջորդ սերունդ, եթե մենք կարողացել ենք դա անել, պարզապես պատկերացրեք` ինչ կկարողանաք դուք», – նշել է Բրենսոնը։
Թռչող սարքը զարգացրել է արագություն, որը 3 անգամ գերազանցում է ձայնի արագությունը։
70–ամյա Բրենսոնի հետ տիեզերք էին բարձրացել Բրենսոնին պատկանող Virgin Galactic ընկերության 5 աշխատակիցներ։
Բրենսոնի խոսքով, երկիր մոլորակի տեսքը ոգեշնչել է իրեն` հոգ տանել մոլորակի մասին։
«Մենք պետք է ամբողջ ուժով հոգ տանենք անհավանական մոլորակի մասին, որտեղ ապրում ենք։ Եվ ես դրան կնվիրեմ իմ մնացած ողջ կյանքը։ Կարծում եմ, որ տիեզերքում եղած մյուս մարդիկ ևս այդպես կանեն», – ասել է Բրենսոնը։
Նա նշել է, որ պլանավորում էր տիեզերք թռչել դեռևս 2004թ.–ին։ Նախագծի իրականացման համար պահանջվել է 17 տարի։
Unity–ի առաջին կոմերցիոն թռիչքը դեպի տիեզերք նախատեսված է հաջորդ տարի։
Հուլիսի 20–ին օդ կբարձրանա մեկ այլ մասնավոր ենթաարբանյակային թռչող սարք։ Amazon–ի հիմնադիր Ջեֆ Բեզոսը կթռչի New Shepard կապսուլում։ Ֆորմալ համարվում է, որ Բեզոսը պարտվել է Բրենսոնին տիեզերական վազքում, բայց ակնկալվում է, որ Բեզոսի տիեզերանավը կբարձրանա մի փոքր ավելի բարձր։–0–
