Ռուսաստանի օդանավակայաններում անձնագրային ավտոմատ ստուգման համակարգ են թեստավորում

ԵՐԵՎԱՆ, 30 հունվարի./Նովոստի–Արմենիա/. Մոսկվայի օդանավակայաններում սկսել են թեստավորել անձնագրային ստուգման ավտոմատացված համակարգ, «Իզվեստիային» հայտնել են ՌԴ ԱԴԾ–ից։    

Գերատեսչությունից նշել են, որ սկզբնական շրջանում նոր ծառայությունից կարող են օգտվել միայն ռուսաստանցիները։ Ուղևորների բացթողումն իրականացվելու է կենսաչափական անձնագրի տվյալների հետ լուսանկարի և մատնահետքի համեմատության միջոցով։ 

Նոր խցիկներն արդեն տեղադրվել են «Շերեմետևո» օդանավակայանի մի քանի տերմինալներում։ Սակայն դրանց փորձարկման ընթացքում ուղևորները պետք է փաստաթղթեր ներկայացնեն նաև սահմանային ծառայության աշխատակցին, պարզաբանել են օդանավակայանից։

Ապագայում համակարգը նախատեսվում է գործարկել նաև «Դոմոդեդովո» և «Վնուկովո» օդանավակայաններում։ Բացի այդ, անձնագրային ստուգման ավտոմատացված համակարգեր արդեն գործում են Մեծ Բրիտանիայում, Նիդերլանդներում և Գերմանիայում։

Փորձագետների խոսքերով, փոփոխությունները կօգնեն տնտեսել աշխատակիցներ  պահելու համար նախատեսված ծախսերը, արագացնել անձնագրային ստուգման ընթացակարգն ու դարձնել այն ավելի հարմարավետ ճանապարհորդների համար։

Սակայն մասնագետները նշում են, որ համակարգի զանգվածային ներդրման համար պետք է փոխել օրենսդրությունը։ Հիմա ուղևորներն իրավունք ունեն հատել սահմանը միայն սահմանապահի ներկայությամբ։–0–