ՌԴ–ն կդյուրացնի քաղաքացիության տրամադրումը հարևան 4 երկրների քաղաքացիների համար

ԵՐԵՎԱՆ, 22 փետրվարի./Նովոստի–Արմենիա/. ՌԴ–ում մշակվում է օրինագիծ, որով դյուրացվում է Ռուսաստանի քաղաքացիության տրամադրումը մի շարք երկրների քաղաքացիների համար, ուրբաթ Ինտերֆաքսին հայտարարել է Պետդումայի` ԱՊՀ–ի, եվրասիական ինտեգրման և հայրենակիցների հետ կապերի հարցերով կոմիտեի ղեկավար Լեոնիդ Կալաշնիկովը։

«Այս օրինագծով չի պահանջվելու հնգամյա ժամկետ ՌԴ քաղաքացիություն ստանալու համար։ Դա վերաբերելու է չորս երկրներին` Ուկրաինային, Բելառուսին, Մոլդովայի, Ղազախստանին», – ասել է Կալաշնիկովը։

«Այս երկրների քաղաքացիներից չի պահանջվելու ապացուցել նյութական վիճակը», – նշել է կոմիտեի ղեկավարը։

Կալաշնիկովի խոսքով, օրինագծում, կփոխվի նաև այն նորմը, ըստ որի օտարերկրացին կարող է դյուրացված կարգով ստանալ ՌԴ քաղաքացիություն այն բանից հետո, երբ երեք տարի ամուսնացած կլինի ռուսաստանցու հետ։ Այս ժամկետը կնվազեցվի և կհասնի 1 տարվա։

Հիմա, ըստ օրենքի, օտարերկրացին կարող է հավակնել ՌԴ քաղաքացիության այն դեպքում, եթե բնակության թույլտվություն կամ ժամանակավոր կացության թույլտվություն ստանալուց հետո հինգ տարի շարունակ բնակվել է Ռուսաստանում։

Բացի այդ, հիմա «ՌԴ քաղաքացիության մասին» օրենքի 14–րդ հոդվածի համաձայն` նախատեսվում է, որ Ռուսաստանում բնակվող օտարերկրացիներն ու առանց քաղաքացիության անձինք իրավունք ունեն դյուրացված կարգով դիմել ՌԴ քաղաքացիության, եթե առնվազն երեք տարի ամուսնացած են ռուսաստանցու հետ։ Բացի այդ, հիմա օտարերկրացին պետք է ունենա Ռուսաստանում բնակվելու համար բավարար ու հաստատված նվազագույն եկամուտ։

«Այս դրույթները կներառվեն ՌԴ կառավարության կողմից պատրաստված օրինագծում, որը վերաբերում է դյուրացված կարգով ՌԴ քաղաքացիություն ստանալուն։ Օրինագիծը Պետդումայի քննարկմանը կներկայացվի փետրվարի վերջին», – նշել է Կալաշնիկովը։

Նրա խոսքով, այս օրինագծով հնարավոր կլինի ստանալ ՌԴ քաղաքացիություն` միաժամանակ չհրաժարվելով արդեն ունեցած քաղաքացիությունից, ինչի մասին ավելի վաղ հայտարարել են համապատասխան աշխատանքային խմբի անդամները։–0–