Կոլորադոյում զբոսաշրջիկը մոլորվել է լեռներում և չի պատասխանել փրկարարների զանգերին, քանի որ նրանք զանգել են անծանոթ համարից

ԵՐԵՎԱՆ, 27 հոկտեմբերի./Նովոստի–Արմենիա/. Կոլորադոյում զբոսաշրջիկը, ով մոլորվել է նահանգի ամենաբարձր լեռը բարձրանալիս, մի քանի ժամ չի պատասխանել փրկարարների հեռախոսազանգերին, քանի որ նրան զանգել են անծանոթ համարից։ Այս մասին գրում է Esquire ամսագիրը` հղում անելով Լեյք շրջանի որոնողափրկարարական ծառայության Facebook–յան էջին։

Տղամարդը համարվել է անհետ կորած այն բանից հետո, երբ հոկտեմբերի 18–ին երեկոյան չի վերադարձել քայլարշավից։ Որոնողափրկարարական ծառայության աշխատակիցները փորձել են հեռախոսով կապ հաստատել նրա հետ, բայց ապարդյուն։ Հաջորդ օրը նրանք սկսել են որոնողական աշխատանքները, սակայն տղամարդուն չի հաջողվել գտնել։

Հոկտեմբերի 19–ի առավոտյան հայտնի է դարձել, որ զբոսաշրջիկին գտել են։ Նա կարողացել է ինքնուրույն գտնել տուրիստական արահետը, որով հասել է իր ավտոմեքենային։ Ավելի ուշ փրկարարները պարզել են, որ տղամարդը չի պատասխանել նրանց հեռախոսազանգերին, քանի որ չի ճանաչել հեռախոսահամարը։–0–