16–ամյա աղջիկը փրկվել է առևանգումից` մեքենայից ցույց տալով TikTok-ում հայտնի ժեստը

ԵՐԵՎԱՆ, 8 նոյեմբերի./Նովոստի–Արմենիա/. ԱՄՆ–ում 16–ամյա աղջիկը փրկվել է առևանգումից`մեքենայից ցույց տալով ժեստ, որը TikTok–ում օգնության կոչ է նշանակում, գրում է ՏԱՍՍ–ը` հղում անելով Fox հեռուստաալիքին։

Աղջիկն անհետացել է դեռ նոյեմբերի 2–ին, նրան առևանգել է 61–ամյա Ջեյմս Հերբերթ Բրիքը։ Երբ աղջիկը ենթադրյալ հանցագործի հետ մեքենայով երթևեկել է Կենտուկի նահանգում, նա փորձել է գրավել հարևան մեքենաների վարորդների ուշադրությունը` ցույց տալով ժեստ, որը սոցցանցում խորհրդանշում է տնային բռնություն։ Դրա համար պետք է պարզել ձեռքի բաց ափը, հետո ծալել բութ մատը, այնուհետև ծալել մնացած մատները` ցույց տալով բռունցք։

Վարորդներից մեկը ճանաչել է ժեստը և զանգահարել է ոստիկանություն` հայտնելով, թե ինչ ճանապարհով է շարժվում կասկածելի տրանսպորտային միջոցը։ Իրավապահները, կանգնեցնելով մեքենան, պարզել են, որ ուղևորը նախկինում անհետ կորած աղջիկն է։ Կասկածյալը ձերբակալվել է։–0–