ԵՐԵՎԱՆ, 9 հուլիսի. /Նովոստի Արմենիա/. Թուրքիայի հյուսիս–արևմուտքում ուղևորատար գնացքի մի քանի վագոն դուրս է եկել ռելսերից, մահացել է 24 մարդ։
Գնացքն ուղևորվում էր Բուլղարիայի հետ սահմանին գտնվող Կապիկուլե քաղաքից Ստամբուլ։ Ըստ նախնական տեղեկությունների, վթարի պատճառը վատ եղանակային պայմաններն են։
Ինչպես հայտնում է ВВС–ի ռուսական ծառայութունը` հղում անելով NTV հեռուստաալիքին, հորդառատ անձրևների պատճառով բլուրը, որի վրա տեղակայված էին երկաթուղային գծերը, ողողվել է։
CNN Turk հեռուստաալիքը հաղորդում է, որ միջադեպը, հնարավոր է, տեղի է ունեցել եղանակային պայմանների հետևանքով փլուզված կամրջի պատճառով։
Գնացքի ուղևորների ընդհանուր թիվը կազմել է 360 մարդ։ Ռելսերից դուրս է եկել 6 վագոն։ Հրապարակված լուսանկարներում երևում են փրկարարական ուղղաթիռներ ու բազմաթիվ շտապօգնության մեքենաներ ։
Ինչպես հայտնում է NTV–ն, մեքենաները մեծ դժվարությամբ են հասնում միջադեպի վայր։
Հարևան քաղաքի իշխանությունները, որտեղ գտնվոմ են վիրավորները, կոչ են արել քաղաքացիներին արյուն հանձնել վիրավորներին օգնելու համար։
Թուրքիայի նախագահ Ռեջեփ Թայիփ Էրդողանը ցավակցություն է հայտնել մահացածների ընտանիքներին։–0–