ԵՐԵՎԱՆ, 26 հուլիսի. /Նովոստի–Արմենիա/. Վոլգոգրադի շրջանային դատարանը վճիռ է կայացրել տեղաբնակ տղամարդու նկատմամբ, ով մեղավոր է ճանաչվել ազգային հատկանիշներով թշնամանք տարածելու համար։ Այս մասին երեքշաբթի
Ինտերֆաքսին տեղեկացրել է շրջանային դատախազության մամուլի քարտուղար Օկսանա Չերեդինինան։
«Դատական նիստում արձանագրվել է, որ 2015 թ.–ի փետրվարի 20–28–ն ընկած ժամանակահատվածում, ինչպես նաև 2015 թ.–ի մայիսի 23–ին երիտասարդը սոցցանցի իր էջում հրապարակել է ծայրահեղական բովանդակությամբ տեսանյութեր և ձայնագրություններ, ինչպես նաև «like» է դրել այլ օգտատերերի նմանատիպ բովանդակությամբ նյութերի տակ», – նշել է Չերեդինինան։
Հակաօրինական գործունեությունը կանխվել է Ռուսաստանի անվտանգության դաշնային ծառայության Վոլգոգրադի շրջանային վարչության կողմից ձեռնարկված օպերատիվ–հետախուզական միջոցառումների արդյունքում։
«Մեղադրյալն ամբողջությամբ ընդունել է իր մեղքը», – նշել է Չերեդինինան։
Դատարանը երիտասարդին դատապարտել է 1 տարի 3 ամիս պայմանական ազատազրկման` 2 տարի փորձաշրջանով։ –0–