Իտալիայի գերագույն դատարանը թույլատրել է քաղցածներին սնունդ գողանալ

ԵՐԵՎԱՆ, 3 մայիսի. /Նովոստի—Արմենիա/. Քաղցը հագեցնելու նպատակով սննդի գողությունը հանցագործություն չէ, վճռել է Իտալիայի գերագույն վճռաբեկ դատարանը` քննելով գործազուրկ ուկրաինացի Ռոման Օստրյակովի գործը, ով 2011 թ.–ին դատապարտվել էր 6 ամսվա ազատազրկման և 100 եվրո տուգանքի երկու կտոր պանիր և մեկ տուփ նրբերշիկ գողանալու համար, որոնք ընդհանուր առմամբ արժեին 4 եվրո։

Այս մասին հաղորդում է ՌԲԿ–ն` հղում անելով BBC-ին։

«Չի պատժվում այն անձը, ով սովից դրդված գողանում է քիչ քանակի ուտելիք քաղցը հագեցնելու համար, ինչը կենսական կարևորություն ունի», – նշվում է դատավճռում։

Իտալական ԶԼՄ–ները դատավճիռը համարել են «ճիշտ և տեղին»։ Corriere Della Sera–ում հրապարակված հոդվածի հեղինակը նշում է, որ Իտալիայում աղքատության եզրին գտնվող մարդկանց թիվը օրեցօր ավելանում է ավելի քան 600–ով։

Ավելի վաղ «Օստրյակովի գործը» քննվել էր Իտալիայի երեք դատական ատյաններում, սակայն Գերագույն վճռաբեկ դատարանի այս վճիռը վերջնական է։ –0–