ԵՐԵՎԱՆ, 29 ապրիլի./Նովոստի–Արմենիա/. Facebook սոցցանցի հիմնադիր Մարկ Ցուկերբերգի ունեցվածքը NASDAQ ամերիկյան բորսայում իրականացվող առուվաճառքի մի քանի ժամում ավելացել է 3,6 մլրդ դոլարով, հաղորդում է telecom.arka.am–ը` հղում անելով Lenta.ru–ին։
Նշվում է, որ NASDAQ–ի առուվաճառքի ավարտին ` ապրիլի 27–ին, Facebook–ի մեկ բաժնետոմսի գինը կազմել է 108,9 դոլար։ Ապրիլի 28–ին բաժնետոմսի արժեքն ավելացել է` հասնելով 117,84 դոլարի։
Այժմ Ցուկերբերգը զբաղեցնում է երկրորդ հորիզոնականը Forbes–ի` աշխարհի ամենահարուստ մարդկանց վարկանիշում` առաջ անցնելով Oracle –ի ստեղծող Լարի Էլիսոնից (Larry Ellison). Oracle–ը կազմակերպությունների համար ծրագրային ապահովման խոշորագույն արտադրողներից է։ Ցուկերբերգի ունեցվածքն այս պահին գնահատվում է 51,1 մլրդ դոլար։
2016 թ.–ի առաջին ամիսներին Facebook կորպորացիան վաստակել է 5,38 մլրդ դոլար։ 2015 թ.–ի նույն ժամանակահատվածում այդ ցուցանիշը կազմել է մոտ 3,5 մլրդ դոլար։ Վերլուծաբանները կարծում էին, որ ընկերության հասույթը մի քանի անգամ պակաս կլինի, հենց սրա հետ է կապված Facebook–ի բաժնետոմսերի ռեկորդային թանկացումը։ Նշվում է նաև, որ իր եկամուտների մեծ մասը (5,2 մլրդ դոլար) ընկերությունը ստանում է գովազդի տեղադրումից։ –0–