ԵՐԵՎԱՆ, 21 դեկտեմբերի. /Նովոստի–Արմենիա/. Ադրբեջանի ԿԲ–ն որոշում է ընդունել անցնել լողացող փոխարժեքին, ինչի հետևանքով ադրբեջանական մանաթի արժեքի կտրուկ անկումը հանգեցրել է նրան, որ առևտրային ցանցերը սկսել են սահմանափակել ներկրված ապրանքների վաճառքը, հաղորդում է РБК–ն։
Haqqin.az պորտալի տվյալներով` հիմա Բաքվում փակ են İrshad Telekom, Music Gallery, Baku Electronics էլեկտրոնիկայի ցանցերը։ Պորտալի հաղորդմամբ` փակման պատճառն ապրանքների վերագնահատումն է։
Պարենային խանութներում դադարեցվել է ներկրված ապրանքների վաճառքը։ Ինչպես haqqin.az–ին տեղեկացրել են առևտրային կետերի սեփականատերերը, հիմա նրանք սպասում են հետագա ցուցումներին ազգային արժույթի փոխարժեքի անկման կապակցությամբ։
Trend.az գործակալությունը հաղորդում է, որ Ադրբեջանի բանկերը ժամանակավորապես դադարեցրել են դրամական փոխանցումները, բազմաթիվ փոխանակման կետեր դադարեցրել են արտարժույթի փոխանակման գործառնությունները։ Փորձագետները մտավախություն ունեն, որ մանաթի արժեզրկումից հետո փոխառուների մոտ լուրջ խնդիրներ կառաջանան` կապված ավելի վաղ վերցված արժութային վարկերի սպասարկման հետ։
«Սպասվում է, որ խնդիրներ կառաջանան` կապված դոլարով վարկերի վերադարձելիության հետ», – զգուշացրել է Տնտեսական և սոցիալական զարգացման կենտրոնի նախագահ Վուգար Բայրամովը։
Դեկտեմբերի 21–ին Ադրբեջանի կենտրոնական բանկը հայտարարել է, որ անցում է կատարում մանաթի լողացող փոխարժեքին` իր որոշումը բացատրելով երկրի տնտեսության մեջ գրանցված արժութային մուտքերի կտրուկ կրճատմամբ և արժութային պահուստների պաշտպանության անհրաժեշտությամբ։ Այս ամենի հետևանքով մանաթի փոխարժեքը հիմնական բոլոր արտարժույթների նկատմամբ կտրուկ նվազել է, մեկ օրում դոլարը թանկացել է 1,05 մանաթով` հասնելով 1,55 մանաթի, եվրոն 1,14 մանաթից հասել է 1,685 մանաթի, ռուսական ռուբլին` 0,15–ից 0,22 մանաթի։
Այսօր դոլարի փոխարժեքը հասել է 1,55 մանաթի, իսկ դա նշանակում է, որ 2015 թ.–ի ընթացքում ադրբեջանական արժույթը կիսով չափ արժեզրկվել է։ Փորձագետների կանխատեսմամբ` առաջիկայում դոլարը կարող է թանկանալ` հասնելով 2–3 մանաթի։
Ավելի վաղ Վերակառուցման և զարգացման եվրոպական բանկի փորձագետները տեղեկացրել էին, որ նավթի համաշխարհային գների անկումը կհանգեցնի Ադրբեջանի տնտեսական իրավիճակի վատացման, որի եկամուտների մեծ մասն ապահովվում է էներգակիրների արտահանման միջոցով։–0–