Հայաստանը և Ուրուգվայը մտադիր են ամրապնդել երկկողմ համագործակցությունը
ԵՐԵՎԱՆ, 27 նոյեմբերի./Նովոստի-Արմենիա/.Հայաստանում Ուրուգվայի նորանշանակ դեսպան Խորխե Ալբերտո Մեյեր Լոնգը (նստավայրը` Մոսկվա) երեքշաբթի Հայաստանի նախագահ Ռոբերտ Քոչարյանին է հանձնել հավատարմագրերը։
«Հանրապետության նախագահը շնորհավորել է դեսպանին` պաշտոնը ստանձնելու առթիվ և հաջողություն մաղթել բարձր առաքելության իրականացման գործում»,-«Նովոստի-Արմենիա» գործակալությանը հայտնել են նախագահի մամուլի ծառայությունից։
Կայացած զրույցի ընթացքում կողմերն ընգծել են, որ Հայաստանի և Ուրուգվայի միջև ստեղծվել են բարեկամական հարաբերություններ և կա հետագայում ևս երկկողմ հարաբերությունները զարգացնելու փոխադարձ ցանկություն։ Այս կապակցությամբ զրուցակիցներն առաջնային են անվանել առևտրա-տնտեսական համագործակցության ընդլայնմանն ուղղված աշխատանքը։
Քոչարյանը և Լոնգը գոհունակությամբ հայտնել են, որ Հայաստանը և Ուրուգվայը հաջող կերպով համագործակցում են նաև միջազգային կազմակերպությունների շրջանակներում։
«Նշելով, որ Ուրուգվայն առաջինը 1965թ. պաշտոնապես ճանաչել է Հայոց Ցեղասպանությունը, դեսպանն ասել է, որ իր երկրում գործում է բավականին ակտիվ հայ համայնք, որն առանձնահատուկ դեր է խաղում երկկողմ հարաբերություններում»,-նշել են մամուլի ծառայությունում։--0—
