Հյուսիս-հարավ ճանապարհային միջանցքի ներդրումային ծրագրի գործադիր տնօրեն է ընտրվել «Հազարամյակի մարտահրավերներ» հիմնադրամի նախկին տնօրենը

Հյուսիս-հարավ ճանապարհային միջանցքի ներդրումային ծրագրի իրականացման պետական ոչ առևտրային կազմակերպությանե գործադիր տնօրեն է ընտրվել Արա Հովսեփյանը, հաղորդում է ՀՀ կառավարության մամուլի ծառայությունը՝ ներկայացնելով Ծրագրի կառավարման խորհրդի հերթական նիստի արդյունքները, որը վարել է ՀՀ վարչապետ Տիգրան Սարգսյանը:

Ավելի վաղ Հովսեփյանը զբաղեցնում էր «Հազարամյակի մարտահրավերներ» հիմնադրամի գլխավոր-գործադիր տնօրենի պաշտոնը: Հիմնադրամի հնգամյա ծրագրի իրագործումը պաշտոնապես ավարտվել է 2011թ.-ի սեպտեմբերի վերջին:

Ինչպես նշվում է կառավարության մամուլի ծառայության տրամադրած հաղորդագրության մեջ, կազմակերպության գործադիր տնօրենի թափուր պաշտոնի համար կազմակերպված մրցույթին ներկայացվել էր 15 հայտ:   
Ինչպես ավելի վաղ հայտարարել է ՀՀ վարչապետ Տիգրան Սարգսյանը, Հյուսիս-հարավ ճանապարհային միջանցքի կառուցման ընդհանուր ծավալը գնահատվում է 1,5 մլրդ դոլար:

ՀՀ կառավարությունը 2010 թ.-ի հունվարի 14-ին հավանության է արժանացրել Հյուսիս-հարավ տրանսպորտային միջանցքի կառուցման ներդրումային ծրագիրը, ինչպես նաև Հայաստանի և Զարգացման ասիական բանկի միջև 500 մլն դոլարի շրջանակային ֆինանսական համաձայնագիրը:

Հյուսիս-հարավ միջանցքի կառուցման ներդրումային ծրագիրը թույլ կտա ապագայում մեղմել Ադրբեջանի և Թուրքիայի կողմից Հայաստանի շրջափակման հետևանքները,  տարանցիկ պետության կարևոր դեր խաղալ տարածաշրջանի երկրների բեռնափոխադրումներում, ինչպես նաև միանալ Սևծովյան շրջանակաձև ավտոմայրուղուն:

«Հազարամյակի մարտահրավերներ» ամերիկյան կորպորացիայի ծրագրի պաշտոնական ավարտի պահին կորպորացիայի դրամաշնորհի շրջանակներում կատարված ներդրումները կազմել են շուրջ 177 մլն դոլար: Այդ ներդրումներն ուղղված էին հանրապետության գյուղական ենթակառուցվածքների զարգացմանը:-0