Թուրքիայի վեց մարզերից 50-ից ավելի ձեռներեցներ մասնակցում են երեքշաբթի մեկնարկած հայ-թուրքական գործարար համաժողովին:
Հայ-թուրքական գործարար համաժողովն անցկացվում է Երևանում արդեն երկրորդ անգամ, գրում է «ԱՌԿԱ» տնտեսական լրատվության գործակալությունը:
«Նախորդ տարի կայացած առաջին համաժողովի ընթացքում մենք մեր թուրք գործընկերների հետ տուրիստական ընկերությունների դաշինք ենք ստեղծել, ինչը շատ է նպաստել երկու երկրների միջև զբոսաշրջության կապերի զարգացմանը, մասնավորապես՝ Թուրքիայում կատարված ուխտագնացությանը: Այսօրվա համաժողովն ավելի լայն շրջանակ է ընդգրկում, քանի որ առաջին անգամ միջոցառմանը մասնակցում են Թուրքիայի վեց մարզերի, մասնավորապես՝ Անկարայի, Ստամբուլի, Դիարբեքիրի, Կարսի ներկայացուցիչները», - ասել է լրագրողներին Հայաստանի արդյունաբերողների և գործարարների միության նախագահ Արսեն Ղազարյանը:
Նա նշել է, որ համաժողովի նպատակն է խորացնել հայ-թուրքական տնտեսական կապերը, աջակցել թուրքական շուկա հայկական արտադրանքի արտահանմանը:
«Մեր հարաբերությունների զրագացմամբ մենք կփորձենք ցույց տալ Թուրքիայի կառավարությանը, որ նույնիսկ փակ սահմանների պայմաններում երկու երկրների գործարար շրջանակները համագործակցում են, և եկել է ժամանակը, երբ Թուրքիայի իշխանությունները պետք է հասկանան իրենց շահն ու Հայաստանին վերաբերվեն առանց նախապաշարմունքների և երրորդ երկրների շահերը հաշվի առնելու», - ավելացրել է նա:
Միության նախագահը նաև նշել է, որ հայկական 14 անուն արտադրանք, որոնք այսօր ներկայացված են Թուրքիայում, բավականին մրցունակ են շուկայում:
«Եթե սահմանները բացվեն, ապա մենք կկարողանանք մասնակցել ավելի լուրջ տարածաշրջանային ծրագրերին և նախաձեռնել համատեղ նախագծեր: Այսօր Հայաստանը պատրաստ է մրցել թուրքական արտադրանքի հետ տեղական և թուրքական շուկաներում: Սակայն այսօր, ցավոք, մենք գրեթե արտահանում չունենք դեպի Թուրքիա», - ընդգծել է նա:
Համաժողովի կազմակերպիչն է Հայաստանի արդյունաբերողների և գործարարների միությունը: Այն անցկացվում է 2010 թ.-ի հոկտեմբերին մեկնարկած USAID –ի «Աջակցություն հայ-թուրքական մերձեցմանը» երկամյա ծրագրի շրջանակներում: 2012 թ.-ին նմանատիպ համաժողով կանցնի Թուրքիայում:
Համատեղ համաժողովների կազմակերպման գործընկերն է Բիզնեսի զարգացման թուրք-հայկական միությունը (TABDC):
Համաժողովի շրջանակներում ակնկալվում է Հայաստանի և Թուրքիայի գործարար կառույցների, մասնավորապես՝ կին ձեռներեցների ասոցիացիաների միջև համագործակցության հուշագրերի ստորագրում:
Ներկայում Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-
